कतारका शेख (राजा) तमिम बिन हमाद अल थानीले पहिलो भ्रमणका आफूले नेपालको प्राचीन इतिहासबारे केही अंश सिक्ने मौका पाएको बताएका छन् । 

बुधबार स्वदेश फर्किएपछि सामाजिक सञ्जाल (एक्स)मार्फत् उनले भ्रमणको अवसर दिने राष्ट्रपति रामचन्द्र पौडेल र प्रधानमन्त्री पुष्पकमल दाहाल प्रचण्डसँगै नेपालका नेता र जनतालाई धन्यवाद दिएका छन् । 

दुई देशको आर्थिक सम्बन्ध विकास गर्ने र द्विपक्षीय सहयोगलाई माथिल्लो स्तरमा पुर्याउने विभिन्न साझेदारीका साथ सम्बन्ध सुदृढ भएकोमा शेख थानीले आफू हर्षित भएको पनि बताए ।

‘मित्रराष्ट्र नेपालको मेरो पहिलो भ्रमणको क्रममा मैले नेपालको प्राचीन इतिहासबारे केही अंश सिक्ने मौका पाएँ । यो अवसर दिनुहुने राष्ट्रपति रामचन्द्र पौडेल र प्रधानमन्त्री पुष्पकमल दाहालसँग सौहार्दपूर्ण छलफल गर्न पनि पाएँ । न्यानो आतिथ्यताका लागि नेपाल, नेपालका नेताहरू र जनतालाई धन्यवाद,’ उनले भनेका छन्, ‘हाम्रो आर्थिक सम्बन्ध विकास गर्ने र द्विपक्षीय सहयोगलाई माथिल्लो स्तरमा पुर्याउने विभिन्न साझेदारीका साथ सम्बन्ध सुदृढ भएकोमा म हर्षित छु ।’

मंगलबार अपरान्ह ४ बजे नेपाल आएका कतारका राजा थानी बुधबार दिउँसो २ः३० बजे स्वदेश फर्किएका छन् । उनको दुई दिने नेपाल भ्रमणलाई नेपालमा निकै चासोका साथ हेरिएको छ । 

उनले मंगलबार नै राष्ट्रपति रामचन्द्र पौडेलसँग भेटवार्ता गरेका थिए ।