२८ जेठ २०८३, बिहीबार
राष्ट्रिय स्वतन्त्र पार्टीका सभापति तथा गृहमन्त्री रवि लामिछानेले आफूले संसदमा बोल्न पाए संसदीय छानबिन समिति मागको दोकान तत्काल बन्द हुने बताएका छन् । उनले आफूलाई एक पटक बोल्न दिन कांग्रेस किन डराएको भन्दै प्रश्न समेत गरेका छन् ।
सामाजिक सञ्जाल फेसबुकमार्फत लामिछानेले कांग्रेस र गगन थापाले आरोप लगाएजस्तो आफूले खुद फारम भरेर सहकारीबाट ॠण मागेको वा लिएको प्रमाणित गरिदिए राजनीति छाड्ने घोषणा गरेका छन् । प्रमाणित नगरे तपाईँ राजनीति छाड्न तयार हो भन्दै लामिछानेले प्रश्न पनि गरेका छन् ।
लामिछानेले फेसबुकमा भनेका छन्, ‘कांग्रेस र गगन थापाजीहरुले आरोप लगाए जस्तो मैले खुद आफैले फारम भरेर उक्त सहकारी बाट ॠण मागेको–लिएको प्रमाणित गरिदिनुस्, म राजनीति छोडिदिन्छु। प्रमाणित नगरे तपाईं राजनीति छोड्न तयार हो? किर्ते कागज र काइते तर्क दिएर गोलमटोल जवाफ दिन पाइदैन।’
उनले आफूले कसैलाई नठगेको भन्दै रास्वपाका नेता कार्यकर्तालाई शिर ठाडो राख्न पनि आग्रह गरेका छन् ।
