२४ जेठ २०८३, आइतबार
प्रेस काउन्सिल नेपालले पत्रकार आचारसंहिता पालनामा सामूहिक प्रतिबद्धता गराउँदै जागरण कार्यक्रम सम्पन्न गरेको छ ।
मंगलवार भक्तपुरको डोलेश्वरमा काउन्सिलद्वारा आयोजित कार्यक्रमको उद्घाटनमै सबै सहभागीले समाचार सम्प्रेषण गर्दा पत्रकार आचार संहिताको पूर्ण पालना गर्ने र गराउने सामूहिक प्रतिबद्धता व्यक्त गरेका हुन् ।
'पत्रकार आचारसंहिताको पूर्ण पालना गर्न र गराउन हामी प्रतिबद्ध छौं', उद्घाटनका क्रममा सहभागी सबै पत्रकारहरूले भने ।
प्रेस काउन्सिल नेपालको आयोजना तथा नेपाल पत्रकार महासंघ भक्तपुरको समन्वयमा भएको युट्युब, अनलाइनसहित पत्रकारिताका चुनौती र आचारसंहिताका सवाल कार्यक्रममा सहभागी भएका विभिन्न सञ्चार माध्यमका सम्पादक, पत्रकार तथा सञ्चारकर्मीहरूले यस्तो प्रतिबद्धता जनाए ।
कार्यक्रममा प्रेस काउन्सिल नेपालका अध्यक्ष बालकृष्ण बस्नेतले समाचार सम्प्रेषण गर्ने क्रममा पत्रकारलाई गल्ती गर्ने छुट नभएको बताए ।
'पत्रकारलाई गल्ती गर्ने छुट छैन, मानवीय त्रुटीले कहिलेकाहीँ हुने गल्ती तत्काल सच्याउनु पर्छ, सच्याउने तत्परता हुनु पर्छ, गल्ती गरेको छ, छैन, त्यसको अनुगमन र नियमन काउन्सिलले नियमित गरिरहेको छ', अध्यक्ष बस्नेतले भने ।
पछिल्लो समयमा छापा माध्यमले पनि युट्युब, अनलाइनमा जानु परेको उनले बताए ।
अहिलेको समयमा डिजिटल मिडियाको प्लेटफर्म प्रयोग नगरी धर नभएको बताउँदै उनले जुनसुकै मिडियाले पनि अनिवार्य रूपमा आचारसंहिताको पालना गर्नुपर्ने बताए ।
राज्यले देशभर मिडिया साक्षरता चलाउनु पर्नेमा जोड दिँदै अध्यक्ष बस्नेतले भने, 'डिजिटल साक्षरता अभियान राज्यले देशभर चलाउनु आवश्यक छ, यसका लागि राज्यले बजेट छुट्याउनु पर्छ, सीमित श्रोत र साधनले प्रेस काउन्सिलले देशभर मिडिया साक्षरता अभियान चलाएका छौं, यसका लागि राज्यले पनि सहयोग गर्नुपर्छ, प्रदेश र स्थानीय सरकारले पनि यस्तो अभियानलाई साथ र सहयोग दिएर अगाडि बढाउनु पर्छ ।'
नागरिकले चलाउने सामाजिक सञ्जाल र पत्रकारले चलाउने मिडियाको फरक के हो भन्ने छुट्याउन सक्नु पर्ने उनले बताए ।
