संसद‌्‌मा मुडभेडको स्थिति आएपछि प्रमुख प्रतिपक्षी दल नेपाली कांग्रेसका सभापित शेरबहादुर देउवाले विपक्षी दलहरूको संयुक्त बैठक बोलाएका छन् । संसद् भवन परिसरमा शुक्रबार बिहान बसिरहेको संसदीय दलको बैठकलगत्तै साढे १० बजे बस्नेगरी सभापति देउवाले विपक्षी दलहरूको बैठक बोलाएका हुन् ।

बैठकमा देउवाले राष्ट्रिय प्रजातन्त्र पार्टी, जनमत, जसपा नेपाल, लोसपा र राष्ट्रिय जनमोर्चालाई बोलाइएको कांग्रेसका प्रमुख सचेतक रमेश लेखकको सचिवालयले जनाएको छ । विपक्षी मोर्चालाई बलियो बनाएर प्रस्तुत गर्नेगरी कांग्रेसले दलहरूसँग संवाद गर्न लागेको हो । 

सहकारी प्रकरणको छानबिनका लागि कांग्रेसले निरन्तर संसदीय छानबिन समिति गठनको माग गर्दै आएको छ । तर, बिहीवार कांग्रेसको विरोधका बाबजुद सभामुख देवराज घिमिरेले बैठक चलाएपछि मुडभेडको स्थिति आएको थियो । संसद् बैठक आज बिहान ११ बजे पुन: बस्दै छ । 

यसअघि एक महिनामा ४ पटक संसदीय दलको बैठकबाट औपचारिक निर्णय गर्दै कांग्रेसले सहकारी प्रकरणमा गृहमन्त्री रवि लामिछानेको संलग्नता रहेको भन्दै संसदीय छानबिन समिति गठनको माग गर्दै आएको छ । 

आज पाँचौ पटक पनि कांग्रेसले औपचारिक निर्णय गर्दै फेरि समिति गठनलाई आफ्नो बटममलाइन बनाउने कांग्रेसको तयारी छ ।