१० साउन २०८३, आइतबार
सहकारी संस्था ठगीको विषय छानबिन गर्ने संसदीय समितिको कार्यादेश (टीओआर) टुंगो लगाउन गठित कार्यदलको बैठक आज बस्दैछ ।
बैठक बिहान साढे ८ बजेका लागि बोलाइएको हो । तर बैठक केही ढिलोगरी शुरू हुने नेपाली कांग्रेसका सहमहामन्त्रीसमेत कार्यदलका सदस्य जीवन परियारले लोकान्तरलाई जानकारी दिए ।
सत्तापक्ष र प्रतिपक्षमा रहेका प्रमुख दलहरूको शनिबार बसेको बैठकमा सहकारी प्रकरणमा छानबिन गर्न संसदीय समिति गठन गर्ने सहमति भएको थियो । तर समितिको कार्यादेश भने टुंगो लागेको छैन । यही टुंगो लगाउन बैठक बस्न लागेको हो ।
कार्यादेश टुंगो लगाउन नेकपा (एमाले)का नेता एवम् कानूनमन्त्री पदम गिरीको नेतृत्वमा कार्यदल गठन गरिएको छ । उक्त समितिमा कांग्रेस सहमहामन्त्री परियार, एमाले प्रमुख सचेतक महेश बर्तौला र राष्ट्रिय स्वतन्त्र पार्टी (रास्वपा)का सांसद शिशिर खनाल सदस्य छन् ।
उपप्रधान तथा गृहमन्त्री रवि लामिछाने सहकारीको रकम हिनामिनामा मुछिएको विषयमा संसदीय छानबिन समिति गठन गरिनुपर्ने मागसहित कांग्रेसले संसदमा अवरोध गर्दै आएको छ ।
सत्तापक्ष र प्रतिपक्षबीच शनिबार सहमति भएसँगै अब संसदको गतिरोध अन्त्य हुने अपेक्षा गरिएको छ । संसद् बैठक आज बिहान ११ बजे बस्दैछ ।
