ललितपुर महानगरपालिका–१७ स्थित बाफलकाे एक टहरोमा आगलागीमा परी मृत्यु हुनेको संख्या चार पुगेको छ । दुई छोरी र आमापछि बुवाको पनि मृत्यु भएको नेपाल प्रहरीले जनाएको छ । मोबिल भण्डारण गरिएको टहरोमा गत वैशाख २३ गते आगलागी भएको थियो ।

तत्कालीन समयमा सञ्जय गिरीको परिवारका सदस्यहरू घाइते भएका थिए । शनिबार सञ्जयको समेत मृत्यु भएको जिल्ला प्रहरी परिसर ललितपुरका प्रमुख एसएसपी शेखर खनालले बताए । 

सञ्जय घाइते भएपछि ग्वार्कोस्थित किस्ट अस्पतालको भेन्टिलेटरमा थिए । किस्टमै उपचार गराइरहेकी सञ्जयकी श्रीमती रुपाको वैशाख ३१ मा मृत्यु भएको थियो । 

आगलागी भएको भोलिपल्टै गिरीदम्पतीका दुई सन्तान ८ वर्षीया प्रिया र ३ वर्षीया एलिसाको मृत्यु भएको थियो । आगोले जलेर घाइते भएका सञ्जयका भतिज नाता पर्ने १५ वर्षीय नित गिरीको उपचार जारी रहेको जानकारी एसएसपी खनालले दिए ।