युवा तथा खेलकुदमन्त्री विराजभक्त श्रेष्ठले टी–२० विश्वकप खेल्न जानका लागि आशावादी हुन क्रिकेटर सन्दीप लामिछानेलाई आग्रह गरेका छन् ।

बिहीबार कीर्तिपुरस्थित त्रिवि मैदानमा अभ्यास गरिरहेका सन्दीपलाई भेटेर उनले यस्तो ढाडस दिएका हुन् ।

मन्त्री श्रेष्ठसँग राष्ट्रिय खेलकुद परिषद् (राखेप)का सदस्य सचिव टंकलाल घिसिङ, नेपाल क्रिकेट संघ (क्यान)का सचिव पारस खड्का पनि उपस्थित थिए । 

विश्वकप खेल्न पठाउन भिसा (प्रवेशाज्ञा)का  लागि आफूहरूले सक्दो प्रयास गरिरहेको उनको भनाइ थियो ।

बलात्कार मुद्दामा निर्दोष सावित भएपनि सन्दीपलाई विश्वकप खेल्न जान अमेरिकाले भिसा दिएको छैन । यसलाई लिएर उनका समर्थक आन्दोलित भएका छन् । 

आगामी जुन १ देखि अमेरिका र वेस्ट इन्डिजमा टी–२० विश्वकप हुँदैछ । नेपाली टोली अहिले अमेरिकामा अभ्यास खेल खेलिरहेको छ ।