१० साउन २०८३, आइतबार
नेकपा एमालेका अध्यक्ष केपी शर्मा ओलीले आगामी आर्थिक वर्षको बजेटमा कमीकमजोरी भएकाले व्यापक छलफल गरेर पारित गर्नुपर्ने बताएका छन् ।
एमाले संसदीय दलको बैठकमा शनिबार सम्बोधन गर्दै उनले बजेटमा सघन छलफल गरेर त्यसलाई पारित गर्नुपर्ने बताए । 'बजेटलाई हामी पूर्णरूपमा समर्थन गर्दै त्यसलाई पारित गर्नेछौं । यसको अर्थ बजेटका कमीकमजोरी नऔंल्याउने भन्ने होइन,' उनको भनाइ उद्धृत गर्दै दलका एकजना सदस्यले भने ।
अध्यक्ष ओलीले आफ्नो क्षेत्रका आयोजनाका निम्ति विनियोजित रकम तथा प्रस्तावित आयोजना बजेटमा समावेश भए नभएको निर्क्योल गर्न आफ्नो दलका सांसदहरूलाई सुझाव दिए ।
उनले सरकारमा सहभागी दलसँग परामर्श नगरी सदनमा बजेट पेस भएको बताए ।
बैठकमा पार्टी उपाध्यक्ष एवं पूर्वअर्थमन्त्री सुरेन्द्र पाण्डेले बजेटका सबल र दुर्बल पक्षको समीक्षा गरेका थिए ।
