२८ असार २०८३, आइतबार
त्रिभुवन अन्तर्राष्ट्रिय विमानस्थलबाट भन्सार छलीको सुनसहित ४ जना पक्राउ परेका छन् ।
भन्सार छलीको सुन संकलन गरेर लैजान लागेको अवस्थामा उनीहरूलाई प्रहरीले नियन्त्रणमा लिएको हो ।
पक्राउ पर्नेमा मोरङ केराबारीका सरोज कोइराला, रौतहट कटहरियाका मोहम्मद इन्तेयाज आलम, सप्तरी सुरुङगाका मोहम्मद अरमान र सप्तरी खडक नगरपालिका–६ बस्ने ज्याउदिन मियाँ छन् ।
प्रहरीका अनुसार कतार एयर उडानद्वारा नेपाल आएका सरोजले भन्सार छली ल्याएको सुन मोहम्मद इन्तेयाजलाई सुनको सिक्री र काँचो सुन करिब ६९ ग्राम ९९ मिलिग्राम सुन दिइरहेका बेला नियन्त्रणमा लिइएको हो ।
त्यस्तै विमानस्थलको अन्तर्राष्ट्रिय आगमन पार्किङ एरियाबाट ५० ग्राम बराबरको सुनको सिक्रीसहित मोहम्मद र ज्याउदिनलाई प्रहरीले नियन्त्रणमा लिएको जनाएको छ ।
कतार एयरको उडानद्वारा दोहाबाट नेपाल आएका ज्याउदिनले भन्सार छली ल्याएको उक्त सुन मोहम्मदलाइ दिने क्रममा पक्राउ परेका हुन् ।
शनिबार नियन्त्रणमा लिइएका चारै जनालाई बरामद सुनसहित भन्सार कार्यालय पठाइएको विमानस्थल सुरक्षा प्रमुख डीआईजी रामदत्त जोशीले जानकारी दिए ।
