०८ साउन २०८३, शुक्रबार
बुटवल–नारायणगढ सडक निर्माणमा ढिलाइ भएको भन्दै प्रधानमन्त्रीलाई ध्यानाकर्षण पत्र बुझाइएको छ । समयमै सडक नबन्दा नागरिकले सास्ती खेप्नुपरेको गुनासो गर्दै लोकतान्त्रिक समाजवादी पार्टी, नेपाल (लोसपा)का केन्द्रीय सदस्य तथा युवा नेता महेन्द्र गुप्ता (प्रशान्त)को नेतृत्वमा ध्यानाकर्षण पत्र बुझाइएको हो ।
रुपन्देहीका प्रमुख जिल्ला अधिकारी (प्रजिअ) गणेश अर्यालमार्फत प्रधानमन्त्री पुष्पकमल दाहाल प्रचण्डलाई ध्यानाकर्षण पत्र बुझाउँदै गुप्ताले अब सरकारले सडक निर्माणकार्य सम्पन्न गर्न तदारुकता देखाउनुपर्ने माग गरे ।
पटक–पटक म्याद थपेर मात्र समस्याको समाधान हुन सक्दैन भन्ने कुरा आफूहरूले बुझिसकेको उनले बताए ।
बुटवल–नारायणगढ सडकको खराब अवस्थाका कारण यात्रु जोखिम मोलेर हिँडिरहेको उनको भनाइ छ । सडकको दुरवस्थाका कारण बुद्ध जन्मस्थल लुम्बिनी आउने पर्यटकको संख्यामा समेत कमी आएको गुप्ताले गुनासो गरे ।
‘सडक विभाग र चिनियाँ निर्माण कम्पनी चाइना स्टेट कन्स्ट्रक्सन इन्जिनियरिङ कर्पोरेशनबीच २०७५ माघ २४ गते सम्झौता हुँदा २०७९ साउन २२ सम्म सडक निर्माण कार्यसम्पन्न गर्ने शर्त थियो ।
‘निर्माण कम्पनीले विभिन्न कारण देखाउँदै पुनः म्याद थप गराएको छ । निर्माण कम्पनीको यही व्यवहार रहे ठेक्का तोडेर सडक निर्माणको जिम्मा अरु कम्पनीलाई दिनुपर्छ,’ ध्यानाकर्षण पत्रमा उल्लेख छ ।
