नेपालको मध्य तथा पश्चिम तराईमा उखरमाउलो गर्मी छ । मध्ये-पश्चिम नेपालको तराई क्षेत्रमा मात्रै होइन काठमाडौं उपत्यकामा समेत गर्मी बढेको छ ।

मध्ये-पश्चिम नेपालको गर्मी अझै कम्तिमा तीन कायम रहने मौसम पूर्वानुमान महाशाखाले जनाएको छ । महाशाखाले विशेष बुलेटिनमार्फत् देशको मध्य तथा पश्चिम तराईका भू–भागमा आगामी तीन दिनसम्म अत्यधिक गर्मीको सम्भावना रहेको जनाएको हो । महाशाखाका अनुसार कञ्चनपुर, कैलाली, बर्दिया, बाँके र दाङ गरी पाँच जिल्लामा अत्यधिक गर्मीको सम्भावना छ ।

पश्चिम नेपालमा गर्मीले सताइरहँदा पूर्वी नेपालको अवस्था भने फरक छ । मनसुन सक्रिय रहँदा सुदूरपूर्वका पहाडी जिल्लाहरूमा लगातार वर्षा भइरहेको छ ।

सुदूरपूर्वमा वर्षासँगै बाढीपहिरो शुरू भएको छ । मनसुनको सुरुवातमै पूर्वी पहाडका संखुवासभा र ताप्लेजुङमा बाढीपहिरो शुरू भएको हो ।

पहिरोमा परेर बिहीबार राति मात्रै ताप्लेजुङमा एकै घरमा चार जनाको ज्यान गएको छ । पहिरोमा पुरिएर फक्ताङलुङ गाउँपालिकाका उपाध्यक्ष रविन साम्रा लिम्बूको परिवारका चार जनाको मृत्यु भए प्रहरीले जनाएको छ । पहिरोमा उनका बुवा, आमा र दुई बहिनीको मृत्यु भएको हो । 

जिल्ला प्रहरी कार्यालय ताप्लेजुङका प्रहरी नायब उपरीक्षक रवि रावलका अनुसार फक्ताङलुङ–२ खेजिनिममा रहेको लिम्बूको घरमाथिबाट राति १ बजेतिर पहिरो खसेको थियो । 

पहिरोमा लिम्बूका बुबा ७१ वर्षीय रामबहादुर साम्रा, आमा जसमाया र जुम्ल्याहा छोरी बहिनीहरू ९ वर्षीया गंगा र जमुनाको मृत्यु भएको उनले बताए । राति सुतिरहेकै बेला पहिरो खस्दा उनीहरूको मृत्यु भएको प्रहरीले जनाएको छ ।

पहिरोमा परी साम्रा परिवारकै २ जना घाइते भएका छन् । ४० वर्षीया युगेन लिम्बू र उनकी तीन वर्षीय छोरी घाइते भएको उनले बताए । 

ताप्लेजुङमा पहिरोमा पुरिएका यसअघि नै एक व्यक्तिको ज्यान गइसकेको छ । बिहीबार सडकमाथिबाट खसेको पहिरोमा पुरिएर ताप्लेजुङमा काबेली तेस्रो जलविद्युत् परियोजनामा कार्यरत मजदुर २५ वर्षीय सबिन राईको मृत्यु भएको थियो ।

पहिरोले दुइवटा घरसमेत बगाएको प्रहरीले जनाएको छ ।

बुधबार रातिदेखिको अविरल वर्षासँगै आएको बाढीले फक्ताङलुङ गाउँपालिका क्षेत्रमा छवटा पुल बगाएको छ । 

पुल बगेपछि यातायातका साधन सञ्चालनमा समस्या भएको जिल्ला प्रहरी कार्यालयले जनाएको छ ।

यस्तै, लगातारको वर्षाका कारण संखुवासभाको खाँदबारी नगरपालिकाका विभिन्न क्षेत्रमा पहिरोले तीन घर बगाएको छ भने २५ परिवार विस्थापित भएका छन् ।

त्यस्तै, संखुवासभामा पहिरोले चार घर बगाएको छ । जिल्ला प्रहरी कार्यालय संखुवासभाका अनुसार खाँदबारी– ११ सिम्लेमा पहिरोले चार घर बगाएको कोशी प्रदेश प्रहरी कार्यालयका सूचना अधिकारी सुमन कुमार तिम्सिनाले बताए । उनका अनुसार वर्षाका कारण चिचिला गाउँपालिका जोड्ने तीन ग्रामीण सडक पनि अवरुद्ध भएका छन् ।

बुधबार रातभरको वर्षाका कारण ताप्लेजुङको तमोर नदी, सिँसावा खोला र सिस्ने खोलाका विभिन्न पाँच ठाउँमा रहेका काठेपुल (गाडी गुड्ने काठका पुल) बाढीले बगाएको प्रहरीले जनाएको छ । यातायात सेवा अवरुद्ध बनेको छ ।