नेपाली कांग्रेसका प्रवक्ता एवं पूर्वअर्थमन्त्री डा. प्रकाशशरण महतले हिन्दू धर्मावलम्बीहरूका आस्थाका केन्द्र पशुपतिनाथ, मुक्तिनाथ र बौद्ध धर्माबलम्बीहरूको उद्गमस्थल लुम्बिनीको दर्शन गर्न आग्रह गरेका छन् ।

भारतीय वर्किङ जर्नालिस्ट युनियनले आज आयोजना गरेको सेमिनारमा उनले नेपाल देवभूमि भएको बताउँदै यी क्षेत्रहरूको दर्शन गर्न आह्वान गरेका हुन् ।

'हामीसँग प्रकृतिले दिएका संसारकै अग्ला हिमशृङखला  छन् । मधेसदेखि हिमालसम्मको लोभलाग्दो हावापानी पनि छ । यसलाई जलवायु परिवर्तनको असरबाट जोगाउन सबै एकजुट हुनुपर्ने समय आएको छ,' प्रवक्ता महतले भने, 'हिन्दू धर्मावलम्बीहरूको आस्थाका केन्द्र पशुपतिनाथ, मुक्तिनाथ र बौद्ध धर्मावलम्बीहरूको उद्गमस्थल लुम्बिनी पनि हाम्रै नेपालमा छन् । यी पवित्र धार्मिक स्थलहरूको दर्शन गर्न म सबैलाई आग्रह गर्दछु ।'

उनले नेपाल र भारतको सम्बन्ध युगौंदेखिको रहि आएको भन्दै सम्बन्धलाई थप सुमधुर बनाउन दुवै देशका नागरिक सचेत हुनुपर्नेमा जोड दिए ।