आईसीसी टी–२० विश्वकपको चौथो सुपर-८ खेलमा बंगलादेशले अस्ट्रेलियालाई १४१ रनको लक्ष्य दिएको छ । एन्टिगुवाको सर भिभियन रिचर्ड्स स्टेडियममा शुक्रबार बिहान टस हारेर ब्याटिङको निम्तो पाएको बंगलादेशले २० ओभरमा ८ विकेट गुमाएर १४० रन बनाएको हो । 

बंगलादेशका लागि कप्तान नजमुल हुसेन शान्तोले सर्वाधिक ४१ रन बनाए । उनीबाहेक तौहीद हृदयले ४० रनको इनिङ खेले । यी दुईबाहेक बंगलादेशका अन्य कुनै खेलाडीले ठूलो इनिङ खेल्न सकेनन् ।
बंगलादेशलाई १४० रनमै समेट्ने क्रममा अस्ट्रेलियाका पैट कमिन्सले ह्याट्रिक विकेट लिए । जारी टी–२० विश्वकपमा ह्याट्रिक विकेट लिने कमिन्स पहिलो र विश्वका सातौं बलर बनेका छन् । 

कमिन्स यो उपलब्धि हासिल गर्ने दोस्रो अस्ट्रेलियाली खेलाडी हुन् । यसअघि ब्रेट लीले २००७ को विश्वकपमा ह्याट्रिक विकेट लिएका थिए ।

अष्ट्रेलियाका लागि एडम जाम्पाले २ विकेट लिए । मिचेल स्टार्क, मार्कस स्टोइनिस र ग्लेन म्याक्सवेलले १–१ विकेट लिए ।