२८ जेठ २०८३, बिहीबार
काँक्रेविहार– भारी वर्षासँगै आएको बाढीमा कारण जाजरकोटकाे कुशे गाउँपालिका–१ तारेचौरमा एक जनाको ज्यान गएको छ । नजिकैको खोलामा माछा मार्न गएका एक शिक्षकको मृत्यु भएको हो ।
अन्य ६ जना भने घाइते भएका छन् ।
शनिबार राति ११ बजे खोलामा माछा मारिरहेका बेला आएको बाढीले बगाउँदा कुशे गाउँपालिका–९ का इन्द्रबहादुर रोकायको मृत्यु भएको कुशे गाउँपालिकाकी उपाध्यक्ष देविका सिंहले आइतवार जानकारी दिइन् । मृतक रोकाय सोही पालिकाको मालटाकुरा माध्यमिक विद्यालयका शिक्षक थिए ।
बाढीमा परी कुशे–४ तम्तीका राजेन्द्रबहादुर शाही, खिमबहादुर शाही, पृथ्वीबहादुर शाही, जीवन जैसी, कुशे –१ तारेचौरका गोविन्द रावत र दीपेन्द्रबहादुर चलाउने घाइते भएको उपाध्यक्ष सिंहले जानकारी दिइन् ।
घाइतेहरूको उद्धार गरिएको उनको भनाइ छ । -रासस
