०२ असार २०८३, मंगलबार
तस्करी गरेर भारत लान लागिएको ६५ किलोग्राम गाँजा विराटनगरबाट बरामद भएको छ । उक्त गाँजा बोक्न प्रयोग भएको कार र मोटरसाइकलसमेत नियन्त्रणमा लिइएको छ ।
सशस्त्र प्रहरी बल बोर्डर आउट पोस्ट (बीओपी) भुटहाले नेपाल–भारत सीमा क्षेत्रबाट बा १६च६०५४ नम्बरको रातो रंगको कार नियन्त्रणमा लिएको हो । कारमा गाँजा लोड गरेको पाइएको प्रहरीले जनाएको छ ।
दुईवटा बोरामा हालेर कारमा लोड गरिएको अवस्थामा गाँजा बरामद गरिएको सशस्त्र प्रहरी बल मोरङका एसपी विश्वबन्धु खड्काले मंगलवार जानकारी दिए ।
उनका अनुसार सोमवार राति विराटनगर १८ दमादिगी बस्तीबाट गाँजा बरामद गरिएको हो ।
बरामद गरिएको गाँजा र सवारीसाधन थप कारबाहीको लागि इलाका प्रहरी कार्यालय रानीमा राखिएको छ । यसअघि पनि बीओपी भुटहाले तस्करीको ठूलो परिमाणको गाँजा बरामद गरेको थियो ।
केही दिनअगाडि पनि भारत तस्करी हुन लागेको १७६ किलो गाँजा जहदा गाउँपालिका २ बाट बरामद भएको थियो ।
तस्करी गरेर भारत पुर्याउनकै लागि धनकुटालगायत पहाडी जिल्लाहरूबाट झिकाएर गाँजा मोरङको दक्षिणी नाका प्रयोग गर्ने गरेको प्रहरीले जनाएको छ ।
सीमावर्ती क्षेत्रनजिक भण्डारण गरिने गाँजा सुरक्षाकर्मीलाई छलेर सीमानाका हुँदै भारत लगिने गरिएको छ ।
