मनसुनजन्य विपद्‌बाट १७ दिनमा २८ जनाको मृत्यु, ३८ घाइते

पछिल्लो दुई सातामा मनसुनजन्य विपद्का घटनामा परेर २८ जनाको ज्यान गएको छ । जेठ २८ गतेदेखि असार १२ (बुधबार)सम्म देशभर मनसुनजन्य घटनाबाट २८ जनाको ज्यान गएको गृह मन्त्रालयले जनाएको छ । यही अवधिमा ३८ जना घाइते भएका छन् । 

यसमध्ये बाढीबाट एक जनाको मृत्यु भएको हो । ज्यान गुमाउनेमा ​मोरङका एक जना छन् भने दुई जना घाइते भएका हुन् । 

यस्तै, विभिन्न ठाउँका पहिरोमा परेर १४ जनाको ज्यान गएको मन्त्रालयले जनाएको छ । 

ज्यान गुमाउनेमा ताप्लेजुङ र जमजुङका पाँच/पाँच जना छन् । संखुवासभा, ओखलढुङ्गामा एक/एक र कास्कीका दुई जनाको ज्यान गएको हो । 

बाढी पहिरोमा परेर १२ जना घाइते भएका छन् भने २५ घर पूर्ण रूपमा क्षति भएको मन्त्रालयले जनाएको छ । 

दुई साताकै अवधिमा चट्याङबाट मात्रै १३ जनाको ज्यान गएको छ भने २४ जना घाइते भएका छन् ।