संविधानविद्हरूले राष्ट्रपतिलाई संविधानको धारा ७६(२) अनुसार नै सरकार गठनको लागि आह्वान गर्न सुझाव दिएका छन् ।

प्रधानमन्त्रीले पेस गरेको विश्वासको मत संसद्‌मा अस्वीकृत भएपछि राष्ट्रपति रामचन्द्र पौडेलले शुक्रबार साँझ संविधानविद्हरूसँग छलफल गरेका थिए । 

सो छलफलमा कानूनविद्हरूले संविधानको ७६(३) प्राविधिक हुने भन्दै ७६(२) अनुसार नै सरकार गठनको आह्वान गर्न सुझाव दिएका बारका अध्यक्ष गोपालकृष्ण घिमिरेले लोकान्तरलाई जानकारी दिए । 

‘कसरी अगाडि बढ्न सकिन्छ भनेर राष्ट्रपतिज्यूले जिज्ञासा राख्नुभएको थियो । कुन अवस्थामा अघि बढ्दा राष्ट्रपति संस्थालाई कम विवादमा पर्छ भन्ने उहाँको आशय थियो,’ छलफलमा सहभागी भएका घिमिरेले लोकान्तरसँग भने, ‘दुई ठूला दलले मिलेर जान्छौं भनेपछि धारा ७६)२) नै उपयुक्त हुन्छ । ७६(३) प्राविधिक हो । कसैले दाबी नगर्दा मात्रै यो धारामा जाने भन्ने हाम्रो सुझाव रह्यो । यसैले ७६(२) अनुसार नै आह्वान गर्नुस् भनेर हामीले सुझाव दियौं ।’

यस्तै, संविधानविद् विपिन अधिकारीले स्थिर सरकारका लागि ७६(२) को विकल्पमा जान नहुने सुझाव दिएको जानकारी दिए ।

‘स्थिर बलियो र टिकाउ सरकार गठनका लागि ७६२ को विकल्प हुँदाहुँदै अन्य विकल्पमा जान उपयुक्त हुँदैन । यसैले ७६(२) अनुसार सरकार गठनको प्रक्रियाका लागि आह्वान गर्न सुझाव दिएको छु,’अधिकारीले लोकान्तरसँग भने ।

छलफलमा संविधानविद्हरू पूर्णमान शाक्य, विपिन अधिकारी, गोपालकृष्ण घिमिरे, शेरबहादुर केसी, टीकाराम भट्टराई, चन्द्रकान्त ज्ञवाली, सीताराम केसीको सहभागिता रहेको राष्ट्रपतिको सचिवालयले जनाएको छ । 

यी मध्ये चन्द्रकान्त ज्ञवालीले मात्रै ७६ (३) अनुसार सरकार गठनको लागि आह्वान गर्नुपर्ने सुझाव दिएका थिए ।

नयाँ सरकारका लागि दाबेदारीको तयारी अवस्थामा बसेका कांग्रेस र एमाले पनि राष्ट्रपतिबाट सरकार आह्वानको पर्खाइमा बसेका छन् ।