२२ असार २०८३, सोमबार
नेकपा एमालेका अध्यक्ष केपी शर्मा ओलीले राष्ट्रपतिसमक्ष प्रधानमन्त्री पदमा दावी पेस गर्दा साना दललाई समेटिएन । शुक्रबार राति ओलीले कांग्रेस र आफ्ना दलका सांसदको मात्रै समर्थनमा राष्ट्रपतिसमक्ष प्रधानमन्त्रीमा दाबी पेस गरेका हुन् ।
दावी पेस गर्दा ओलीले १६६ सांसदको समर्थन जुटाएका छन् । जसअनुसार कांग्रेसका ८८ र एमालेका ७८ सांसद छन् । ओलीले आफ्नो पक्षमा बहुमत सांसद रहेकाले संविधानको धारा ७६ को उपधारा २ अनुसार प्रधानमन्त्री नियुक्त गर्न आग्रहसहित राष्ट्रपतिलाई पत्र बुझाएका हुन् ।
कांग्रेस र एमालेको गठबन्धनमा राप्रपा, जसपा, जनमत, लोसपा, जसपा नेपाललगायतका दल छन् । तर, उनले सरकार निर्माणको प्रक्रियामा कांग्रेसको मात्रै साथ लिएका हुन् ।
साना दल अस्थिर रहने तथा उनीहरु सरकारबाट बाहिरिँदा फेरि विश्वासको मत लिनुपर्ने जस्ता झन्झट हुने कारण ओलीले कांग्रेसको मात्रै साथ लिएर राष्ट्रपतिसमक्ष हस्ताक्षर बुझाएको एक नेताले जानकारी दिए ।
ओली प्रधानमन्त्रीमा शुक्रबार नियुक्त हुने र सोही दिन शपथ हुनेछ ।
