११ साउन २०८३, सोमबार
नेपाली कांग्रेसकी नेतृ सुजाता कोइरालाले अब पार्टीका तीन जना कोइराला (शेखर, शशांक र सुजाता) एकजुट हुने बताएकी छिन् ।
शेखरसहित शुक्रबार पत्रकार सम्मेलन गर्दै कोइरालाले अबको नेतृत्व शेखर कोइरालाले गर्ने पनि बताइन् । शेखरले लिने लिडरसिपमा तीन जना नै कोइरालाको साथ रहने दाबी पनि उनले गरेकी छिन् ।
‘हामी तीन कोइरालाहरू एकजुट हुनुपर्छ । हाम्रो हजुरबुबा, बुवाहरूले जुन सपना देख्नुभएको थियो त्यो सपनालाई पूरा गर्नैपर्छ । त्यो पूरा गर्नको लागि शेखर दाले लिडरसिप लिनुभएको छ,’ सुजाताले भनिन्, ‘त्यो लिडरसिपलाई सबैले सहयोग गरिकन मुलुकलाई राम्रो निकास दिनुपर्छ । सबै जना मिल्नुपर्छ । झगडा गर्नुहुन्न । हामी तीन जना मिलेरै जान्छौं । कुनै किसिमको केही विवाद छैन ।’
कांग्रेसमा १३ र १४ औं महाधिवेशनमा तीन कोइरालाहरू एक ठाउँमा बसेका थिएनन् ।
१३ औं तीन कोइराला एकजुट भएर नलाग्दा रामचन्द्र पौडेल सभापतिमा शेरबहादुर देउवासँग पराजित भएका थिए । तर महामन्त्रीमा शशांक भने पौडेल पक्षबाट जितेका थिए ।
१४ औं महाधिवेशनमा शेखर कोइराला देउवासँग भिडे । तर दोस्रो चरणमा पराजित हुन पुगे ।
पछिल्लो महाधिवेशनमा शेखरलाई शशांकले खुलेर साथ नै नदिएका हुन् । सुजातासमेत खुलेर शेखरको पक्षमा लागेकी थिइनन् ।
यस अघि शेखर, शशांक र सुजाताले तीन चारपटक नै सँगै खाना खाएर आफूहरूले मिलेर जाने बताउँदै आएका थिए । तर दाबी गरेजस्तो महाधिवेशनमा उनीहरू मिल्न सकेका छैनन् ।
