वासिङ्टन–अमेरिकाका पूर्वराष्ट्रपति बाराक ओबामाले डेमोक्र्याट पार्टीकी उम्मेदवार कमला ह्यारिसलाई राष्ट्रपतीय निर्वाचनका लागि समर्थन गरेका छन् । यसले उपराष्ट्रपति कमलाको उम्मेदवारीको सम्भावनालाई थप बल पुर्याएको छ । 

‘यसै हप्ताको शुरूमा मिशेल (श्रीमती) र मैले साथी कमला ह्यारिसलाई फोन गरेका थियौँ । हामीले उहाँलाई भनेका थियौँ– तपाईँ संयुक्त राज्य अमेरिकाको एक शानदार राष्ट्रपति बन्नुहुनेछ र यसमा हाम्रो पूर्ण समर्थन रहनेछ,’ ओबामाले सामाजिक सञ्जाल एक्समा शुक्रबार लेखेका छन्, ‘हाम्रो देशका लागि यो महत्वपूर्ण क्षण हो । नोभेम्बरमा उहाँलाई जिताउन सक्दो प्रयास गर्नेछौं । सम्पूर्ण अमेरिकी शुभचिन्तक र मतदाता हामीसँग सामेल हुनुहुनेछ भन्ने हामी पूर्ण आशा गर्छौँ।’ 

कमला​ले आइतबार नै राष्ट्रपति जो बाइडेनको पनि समर्थन प्राप्त गरिसकेकी छिन् । आफ्नै दलका अर्का नेता ओबामाको समर्थनले कमलाको चुनावी अभियानको बढ्दो गतिलाई अझ बढाउने विश्वास लिइएको छ । अन्तिम समयमा उम्मेदवारी घोषणा गरेदेखि नै उनको समर्थनका आधारहरू बढ्दै गएका छन् ।