भारतको दिल्लीस्थित एक कोचिङ सेन्टरको बेसमेन्टमा वर्षाले जमेको पानीमा डुबेर तीन विद्यार्थीको मृत्यु भएको छ ।

नयाँ दिल्लीको राजेन्द्रनगरस्थित राव आईएएस कोचिङ सेन्टरको बेसमेन्टमा शनिवार राति भएको उक्त घटनामा परी मृत्यु हुनेमा दुई छात्रा र एक छात्र रहेको भारतीय सञ्चारमाध्यम आजतकले जनाएको छ ।

शनिवार बेलुका बेसमेन्टमा फसेर एक जनाको मृत्यु भएको र दुईजना बेपत्ता भएको समाचार सार्वजनिक भएको थियो । खोजीका क्रममा बेपत्ता भएका दुवैको शव फेला परेको थियो । यससँगै मृतकको संख्या तीन पुगेको हो । 

बेसमेन्टमा पानी सात फिटसम्म भरिएको र विद्यार्थी फसेको जानकारी पाएपछि भारतको राष्ट्रिय विपद व्यवस्थापन बलको टोली खोज तथा उद्धारमा खटिएको थियो । बेसमेन्टमा भरिएको पानी पम्पसेटको सहायताले बाहिर निकालिए पनि विद्यार्थीको ज्यान भने जोगिएन ।

उक्त घटनाको विरोधमा विद्यार्थीहरू आन्दोलित भएका थिए । लगत्तै दिल्ली सरकारले घटनाको अनुसन्धान गर्न र दोषीलाई कारबाही गर्न प्रहरी प्रशासनलाई निर्देशन दिएको थियो ।

यस घटनालाई लिएर प्रहरीले दुई जनालाई पक्राउ गरेको छ । उनीहरू अहिले हिरासतमा रहेका छन् ।