दुई तिहाई बहुमत भएको सत्ता पक्षका सांसद नै हाजिर गर्दै बाहिरिँदै गरेपछि गणपुरक संख्या नपुगेर प्रतिनिधिसभाको आइतबारको बैठक स्थगित भएको छ ।

बैठकमा राष्ट्रिय सभामा उत्पत्ति भएको शहीद दशरथचन्द स्वास्थ्य विज्ञान विश्वविद्यालय विधेयक–२०८० पारित गर्ने कार्यसूची थियो । बैठकमा शिक्षा, विज्ञान तथा प्रविधिमन्त्री विद्या भट्टराईले विधेयकमाथि ‘विचार गरियोस’ भन्ने प्रस्ताव प्रस्तुत गरेकी थिइन् ।

विधेयकको सैद्धान्तिक छलफल र छलफलका क्रममा उठेका प्रश्नको मन्त्री भट्टराईले जवाफ दिएपछि आइतबारै पारित गर्ने कार्यसूची थियो ।

सभामुख देवराज घिमिरेले विधेयकको सैद्धान्तिक छलफल सकिएको भन्दै विधेयक पारित गर्न प्रस्ताव गरेलगत्तै राष्ट्रिय स्वतन्त्र पार्टी (रास्वपा) प्रमुख सचेतक सन्तोष परियारले गणपुरक माग गरेका थिए । प्रतिनिधिसभाको धारा ९४ अनुसार प्रतिनिधिसभामा प्रस्तुत भएका कुनै पनि प्रस्ताव पेश गर्न सम्पूर्ण सदस्य संख्याको एक तिहाई नहुँदासम्म पेश गर्न नमिल्ने बताए ।

‘नेपालको संविधानको धारा (९४) अनुसार प्रतिनिधिसभामा छलफल भएका कुनै पनि प्रश्न र प्रस्ताव सम्पूर्ण सदस्य संख्याको एक चौथाई नभएसम्म निर्णयार्थ प्रस्तुत गर्न मिल्दैन । त्यसैले निर्णयार्थ प्रस्तुत नगरियोस भन्ने माग गर्दछु’, उनले भने । सभामुखले उक्त चरण प्रवेश नगरेको बताएपछि परियार आफ्नो सिटमा बसे । सभामुखले घिमिरेले ‘शहीद दशरथचन्द स्वास्थ्य विज्ञान विश्वविद्यालय विधेयक–२०८०’ माथि विचार गरियोस भन्ने प्रस्तावलाई निर्णथार्र्य प्रस्तुत गरेपछि परियार फेरि उठे । सभामुखले बोल्न समइ दिए ।

परियारले यसअघि भनेकै भनाइ दोहो¥याए । त्यसपछि सभामुख घिमिरेले बैठकमा उपस्थित सांसद संख्या गणना गर्न सचिवायलका कर्मचारीलाई निर्देशन दिए । संख्या गन्दा प्रतिनिधिसभामा ६७ जना मात्र उपस्थित थिए । जबकि सम्पूर्ण संख्या २ सय ७५ को एक चौथाई पुग्न ६९ सांसद बैठमा उपस्थित भएको हुनुपर्छ । संसदमा प्रस्तुत विधेयक वा अरु प्रस्ताव पारित गर्ने प्रमुख दायित्व सत्ता पक्षको हो ।

संसदमा बहुमत हुने भएकाले सभामा कम्तिमा एक चौथाई सदस्य संख्या पु¥याउने जिम्मेवारी सत्ता पक्षकै हुन्छ । तर, नेपालको संसदमा सांसदहरु भत्ताका लागि हाजिर गर्दै बाहिरिँदै गर्ने प्रवृत्तिका कारण पटकपटक गणपुरक संख्या नपुगेर बैठक स्थगित हुने गरेको छ । गणपुरुक माग भएपछि सत्ता पक्षका प्रमुख सचेतकहरुले फोन गरेर आप्ना सांसदलाई बोलाउने प्रयास गरेका थिए ।

तर, सबै सांसद टाढै पुगिसकेका कारण तत्काल उपस्थित हुन सकेनन् र बैठक स्थगन भयो । प्रतिनिधिसभाको अर्को बैठक सोमबार अपराह्न १ बजेका लागि बोलाइएको छ ।