०६ साउन २०८३, बुधबार
रुपन्देहीको बुटवल उपमहानगरपालिकाका मुख्य स्थानमा उच्च क्षमताका हाइमास्ट लाइट जडान भएका छन् । बुटवलका २३ वटा चाैकचौराहामा १० मिटर, १२.५ मिटर र १६ मिटरका लाइट जडान भएका हुन्।
हाइमास्ट लाइटको मंगलवार बुटवल उपमहानगरका प्रमुख (मेयर) खेलराज पाण्डेयले उद्घाटन गरे । नयाँ बसपार्कमा रहेको हाइमास्ट लाइटको स्विच अन गरेर उनले उद्घाटन गरेका थिए ।
सो अवसरमा मेयर पाण्डेयले बुटवललाई उज्यालो शहरका रुपमा विकसित गर्दै रात्रीकालीन बजार सञ्चालन गर्ने योजनाले मूर्तरुप लिँदै गरेको बताए । उनले बुटवलका मुख्य सडक, चौक, चौराहा र सार्वजनिक स्थलहरूमा रातिमा समेत सुरक्षित हुने गरी उच्च क्षमताका लाइटहरू जडान गरिएको उल्लेख गरे ।
मेयर पाण्डेयले हाइमास्ट लाइट जडान गर्न बाँकी रहेका स्थानहरूमा चालू आर्थिक वर्षमा जडान गर्ने गरी बजेटको व्यवस्था गरेको बताए । उनका अनुसार अहिले बुटवललाई उज्यालो, हरियालीयुक्त र सफा शहरका रुपमा स्थापित गर्नका लागि काम भइरहेको छ । मुख्य सडकका डिभाइडर र दायाँबायाँ बिरुवा रोप्ने, अन्य क्षेत्रमा हरियाली बनाउने र सरसफाइ अभियान सञ्चालन भइरहेको उनले बताए ।
बुटवलका योगीकुटी चौक, कालिका चौक, बसपार्क, अस्पताल लाइन, पुरानो बसपार्क, लक्ष्मीनगर गेट, बीटीआई चौक, राजमार्ग चौराहा, जीतगढी किल्ला र गोलपार्कमा १६ मिटरका १२ वटा लाइट जडान भएका छन् ।
त्यस्तै बीपी चौक, जेसिज चौक, तीनकुने चौक, टक्सार चौक, देवीनगर चौपारी चौक, देवशिद्ध चौक र बधशाला क्षेत्रमा साढे १२ मिटरका ७ वटा लाइट जडान भएका छन् ।
यस्तैगरी नेपाल टेलिकमअगाडि, उपमहानगरको गेट, होराइजन चौक र बुद्धनगर स्वास्थ्य चौकीनजिकै १० मिटरका ४ वटा लाइट जडान भएको बुटवल उपमहानगरका शहरी पूर्वाधार महाशाखा प्रमुख सुमन श्रेष्ठले बताए ।
‘टेन्डरमार्फत २ करोड ७ लाख ९३ हजार ७३५ रुपैयाँमा नेपाल पावर सोलुसन प्रालि हेटौडासँग २०८० माघ १२ गते हाइमास्ट लाइट जडानका लागि ठेक्का सम्झौता भएको थियो,’ उनले भने, ‘जसको शिलान्यास फागुन २ गते भएको थियो ।’
