धादिङ, ११ कार्तिक– सप्तरीको राजविराजबाट काठमाडौं आउँदै गरेको रात्रीबस धादिङको गजुजरी–५ धारबेसीबाट त्रिशुली नदीमा खस्दा मृत्यु हुनेको संख्या १९ पुगेको छ ।
प्रहरीले नदीबाट १९ जनाको शव निकालिएको जनाएको छ । प्रहरीका अनुसार नदीबाट ७ महिला, ३ नाबालक र ९ पुरुषको शव निकालिएको छ ।
शनिबार बिहान ६ बजेतिर ना ६ ख १४६७ नम्बरको बस गजुरी–५ घारबेसीबाट त्रिशुली नदीमा खसेको हो । बसमा करिब ६० जना यात्रु रहेको प्रहरीको अनुमान छ ।
नदीबाट १४ जना यात्रुको उद्दार गरिएको प्रहरीले जनाएको छ । नदीमा डुबेकाे बस फेला परेपनि सिसा फुटाएर बसभित्र जान नसकिएकाले क्रेन लगाएर बस बाहिर निकाल्ने तयारी भइरहेकाे प्रहरीले जनाएको छ । उद्दार गरिएका घाइतेहरुलाई गजुरी अस्पतालमा राखिएको छ । २ जना गम्भीर घाइतेलाई थप उपचारका लागि काठमाडौं लगिएको प्रहरीले जनाएको छ ।
मृत्यु हुने यात्रुको संख्या बढ्न सक्ने प्रहरीको जनाएको छ । बसमा रहेका २४ यात्रु अझै बेपत्ता रहेका जनाइएको छ ।
चालक निदाएका कारण बस दुर्घटना भएको प्रहरीको प्रारम्भिक अनुमान छ ।
