०६ असार २०८३, शनिबार
महोत्तरीको जलेश्वर नगरपालिका– ५ बस्ने गफुर राइनसँग धम्की दिँदै पैसा मागेको आरोपमा प्रहरीले दुई जनालाई पक्राउ गरेको छ ।
पक्राउ पर्नेमा जिल्लाको रामगोपालपुर नगरपालिका– ५ घर भई जलेश्वरमा डेरा गरी बस्ने २४ वर्षीय सुनिलकुमार राउत र १९ वर्षीय करण मण्डल रहेका छन् ।
उनीहरूलाई शनिबार दिउँसो पक्राउ गरिएको जिल्ला प्रहरी कार्यालयका प्रवक्ता प्रहरी नायब उपरीक्षक सन्तुलालप्रसाद जैसवारले बताए ।
प्रहरीका अनुसार केही दिनदेखि गफुरलाई दुवै युवकले बाटोमा भेटेर चिठी दिँदै ९२ हजार रुपैयाँ माग गरेका थिए ।
उनीहरूले धम्की दिन थालेपछि गफुरले प्रहरीमा मौखिक उजुरी दिएका थिए ।
सोही जानकारीका आधारमा प्रहरीले शनिबार दुवै युवकलाई जलेश्वर–१ स्थित महादेव मन्दिरको परिसरबाट पक्राउ गरेको हो ।
थप अनुसन्धान भइरहेको प्रहरीले जनाएको छ ।
