२५ जेठ २०८३, सोमबार
सहकारीको बचत हिनामिना सम्बन्धमा छानबिन गर्न बनेको संसदीय विशेष समितिले रास्वपा सभापति तथा गोर्खा मिडिया नेटवर्कका तत्कालीन प्रबन्ध निर्देशक रवि लामिछानेसँग शुक्रबार बयान लिएको छ ।
समितिको कार्यालय सिंहदरबारमा हिजो लामो समय लगाएर समितिले लामिछानेसँग बयान लिएको हो । समितिले रविसँग सात घण्टा बयान लिएको थियो । बयान राति १ बजेसम्म चलेको थियो ।
बयानका क्रममा लामिछानेले आफूमाथि लागेका आरोपको सबै दोषारोपण जीबी राईमाथि लगाएर उम्कने प्रयास गरेका छन् ।
लामिछानेले आफूलाई पनि समितिले न्याय दिने विश्वास व्यक्त गरे । बयानपछि बाहिर निस्किने क्रममा सञ्चारकर्मीहरूलाई संक्षिप्त प्रतिक्रिया दिँदै आफूले सबै प्रश्नको तथ्यसहित जवाफ दिएकोले समितिले न्याय दिने उनले विश्वास व्यक्त गरे ।
उनले सहकारीको एक पैसा पनि आफूले दुरूपयोग गरेको दोहोर्याए । 'मैले सबै प्रश्नको तथ्यसहित जवाफ दिएको छु । समितिले सबै पीडितलाई दिने छ । न्यायकै खोजीमा रहेको मलाई पनि न्याय गर्ने छ,' उनले भने, 'सहकारीको एक पैसा पनि मेरो पेटमा परेको छैन । लिएको छैन/थिएन ।'
