प्रतिनिधिसभाका स्वतन्त्र सांसद डा. अमरेशकुमार सिंहले सोमबार काठमाडौंको टुँडिखेलमा नेताहरूमाथि भएको नाराबाजी खतराको घण्टी भएको बताएका छन् । नेताहरू नसुध्रिए स्थिति भयावह हुने उनको भनाइ छ ।

मंगलबार प्रतिनिधिसभा बैठकको आकस्मिक समयमा सांसद सिंहले नेताहरू नसुध्रिए भयावह स्थिति आउन सक्ने चेतावनी दिएका हुन् ।

‘हिजो टुँडिखेलमा घटना भएको छ, त्यो हाम्रो लागि खतराको संकेत हो । नेताजीसँग प्रश्न गर्न चाहन्छु, पहिले जस्तो गर्ने कि सुध्रिने ?,’ उनले प्रश्न गरे ।​

बंगलादेशमा शेख हसिनासँग ७ महिनाको ताजा दुई तिहाइको बहुमत भए पनि त्यसले काम नगरेको उनले टिप्पणी गरे ।

‘लोकतन्त्र कही जाँदैन, तर हावा हुन्डरीमा नेताजी र दलहरू जान सक्छन्,’ सांसद सिंहले भने ।

सोमबार टुँडिखेलमा प्रधानमन्त्री केपी शर्मा ओली र कांग्रेस सभापति शेरबहादुर देउवा सहभागी गौरा पर्वको कार्यक्रममा नेताहरूविरुद्ध नाराबाजी भएको थियो ।