३० असार २०८३, मंगलबार
पाँचथरको फालेलुङ–५ स्थित डाँडागाउँ शोकमा डुबेको छ । विस्फोटक पदार्थ पड्किएर एकै परिवारका दुई बालबालिकाको ज्यान गएपछि पूरै गाउँ शोकमा डुबेको हो ।
११ वर्षका दिप्सन र दुई वर्षकी प्रियंशा साँवाको विस्फोटक पदार्थ पड्किएर ज्यान गएको हो । दिप्सनको इलाम अस्पताल र प्रियंशाको बीएन्डसी अस्पताल बिर्तामोडमा उपचारका क्रममा ज्यान भएको हो । उनीहरू एकै घरमा दाजुबहिनी हुन् ।
उनीहरू साथीकोमा खेल्न आएका बेला विस्फोटक पदार्थ पड्किएको थियो । उनीहरूको घर र घटनास्थल ५ मिनेटको दुरीमा पर्छ ।
विस्फोटक पदार्थ पड्किएर मृत्यु भएको हो । बुवा दिलीप वैदेशिक रोजगारीको क्रममा मलेसियामा छन् । ‘बुवा वैदेशिक रोजगारीमै छन् । आमा पूजा छोराछोरीको शव लिएर घर आउँदै छिन्,’ फालेलुङ–५का वडा अध्यक्ष भरतकुमार खपाङ्गीले भने, ‘योभन्दा ठूलो पीडा के हुन्छ र ? गाउनै शोकमा डुबेको छ । गाउँका कसैको आँखामा आँसु रोकिएका छैनन् ।’ दिलिप र पूजाका एक छोरा र एक छोरी मात्रै थिए ।
बच्चाहरूले खेल्ने क्रममा विस्फोटक पदार्थ चलाएपछि पड्किएको हुनसक्ने प्रहरीले जनाएको छ । बिहीबार ज्ञानुराज राई बस्ने घरको पिछाडिपट्टी बारीमा बालबालिकाले विस्फोटक पदार्थ भेटेको र खेल्ने क्रममा पड्किएको घटनास्थलमा रहेका प्रहरी निरीक्षक रूपेश तामाङले बताए । ‘घटनास्थलमा हतौडा र छुरा पनि भेटिएको छ,’ इन्स्पेक्टर तामाङले भने, ‘हाम्रो प्रारम्भिक अनुसन्धानले विस्फोटक पदार्थलाई चलाएपछि पड्किए क्षति भएको देखिएको छ ।’
उक्त विस्फोटक पदार्थ जनयुद्धकै बेलाको हुन सक्ने प्रहरीको अनुमान छ । विस्फोटक पदार्थ के हो भन्ने अहिलेसम्म खुलिनसकेको प्रहरीले जनाएको छ ।
बिहीबार घटना भएको स्थलकै नजिकै अर्काे विस्फोटक पदार्थ पनि फेला परेको छ । नेपाली सेनाको डिस्पोजल टोलीले उक्त पदार्थ फेला पारेको हो । सो क्षेत्रमा अन्य पनि विस्फोटक पदार्थ हुनसक्ने अनुमान गर्दै नेपाली सेनाको डिस्पोजल टोलीले खोजिरहेको इन्स्पेक्टर तामाङले बताए ।
भेटिएको विस्फोटक पदार्थ टोलीले डिस्पोज गर्ने तयारी थालेको पाँचथर प्रहरी प्रमुख हेमन्त भण्डारीले जानकारी दिए । भेटिएको वस्तु ग्रिनेड वा बम हुन सक्ने प्रहरीको अनुमान छ ।
बिहीबार दिउँसो ३ बजे विस्फोटक पदार्थ पड्किँदा ४ जना बालबालिका घाइते भएका थिए । घाइते भएका दुई बालबालिका भने उपचारपछि घर फर्केका छन् ।
