३० जेठ २०८३, शनिबार
अर्थ मन्त्रालयले दुग्ध विकास संस्थानमा शर्तसहित ६० करोड रुपैयाँ ऋण लगानी गर्ने भएको छ । अर्थ मन्त्रालयले यसबारे मन्त्रिपरिषदमा प्रस्ताव पेश गर्न कृषि तथा पशुपन्छी विकास मन्त्रालयलाई सहमति दिएको हो ।
चालु आर्थिक वर्षका लागि दुग्ध विकास संस्थानका नाममा ऋण लगानीअन्तर्गत १ करोड रुपैयाँ बजेट व्यवस्थापन भएको थियो । त्यसमा कृषि मन्त्रालयमा विनियोजित रकमबाट थप ५९ करोड रुपैयाँ रकमान्तर गरेर कूल ६० करोड ऋण लगानी गर्ने गरी मन्त्रिपरिषदमा प्रस्ताव पेश गर्न सहमति दिइएको हो ।
दुग्ध विकास संस्थानले यो रकम तत्कालका लागि किसानहरूलाई दूधको बाँकी रकम भुक्तानीमा प्रयोग गर्न सक्नेछ ।
यससम्बन्धी प्रस्ताव मन्त्रिपरिषदबाट स्वीकृत भएपछि सरकारले संस्थानमा ऋणको रुपमा लगानी गर्नेछ ।
