रुस–युक्रेन युद्धले थप भीषण रूप लिँदैगर्दा पछिल्ला घटनाक्रमहरूमा दुबै पक्षबाट व्यापक आक्रमण र प्रत्याक्रमण भएका छन् । त्यसले ठूलो जनधनको क्षतिसमेत पुगेको छ । 

रुसले युक्रेनको राजधानी किभमा आइतवार रातभर आक्रमण गर्यो । आक्रमणका क्रममा युक्रेनी हवाई प्रतिरक्षा प्रणालीले २० भन्दा बढी क्रुज र ब्यालिस्टिक क्षेप्यास्त्र खसाल्न सफल भएको बीबीसी रसियाले जनाएको छ । 

किभ नगरपालिकाका उच्च कर्मचारी सेरही पोपकोको भनाइ उदृत गर्दै बीबीसी रसियाले लेखेको छ, ’किभमा आक्रमण गर्न प्रयोग गरिएका क्षेप्यास्त्रहरू रुसको सारातोभ क्षेत्रबाट युक्रेनतर्फ प्रक्षेपण गरिएका थिए ।’

किभको स्व्याटोशिन, गोलोसेभो, र सेभचेन्को क्षेत्रमा क्षेप्यास्त्रको टुक्रा खसेपछि आगलागी भएको र त्यसमा दुईजना गम्भीर घाइते भएको उनले जानकारी दिए । 

रुसको आक्रमणबाट विभिन्न गैर–आवासीय भवन, सवारीसाधन र सार्वजनिक सम्पत्तिमा क्षति पुगेको छ ।

किभका मेयर भिटाली क्लिट्स्कोका अनुसार स्व्याटोशिन क्षेत्रमा चारवटा सवारीसाधनमा आगलागी भएको छ भने दुईतले गैर–आवासीय भवन, मेट्रो स्टेसननजिकै रहेका घर र स्टेसनको काँचको ढोकामा समेत क्षति पुगेको छ । 

त्यसैगरी, गोलोसेभो र शेभचेन्को क्षेत्रमा पनि आगलागी र भौतिक संरचनाहरूमा क्षति भएको छ । मेयर क्लिट्स्कोले सो क्षेत्रमा तत्काल आपतकालीन सेवाहरूलाई परिचालन गरिएको जानकारी दिएका छन् ।

रुसले किभलाई निशाना बनाइरहँदा युक्रेनले पनि रुसको बेलगोरोड क्षेत्रमा हमला गरेको छ । बेलगोरोडका गभर्नर व्याचेस्लाभ ग्लाडकोभले बीबीसी रसियालाई यसबारे जानकारी दिएका छन् ।

उनले भनेका छन्, ‘युक्रेनको आक्रमणमा परी बेलगोरोडमा एक बालबालिका केन्द्र र एक विद्यालयमा प्रत्यक्ष क्षति पुगेको छ । यस आक्रमणमा नौजना गम्भीर घाइते भएका छन् र विभिन्न गैर–आवासीय भवनहरूमा आगलागी भएको छ ।’

किभसँगैरुसले युक्रेनको खार्किभमा पनि आक्रमण गरेको थियो । त्यहाँ पनि जनधनको ठूलो क्षति भएको छ । खार्किभमा आइतवार राति गरिएको ब्यालिस्टिक मिसाइल आक्रमणबाट कम्तीमा ४७ जना मानिस घाइते भएका छन्, जसमा सातजना बालबालिका छन् ।

खार्किभका मेयर इहोर टेरेखोभले आक्रमणबाट शहरको खेलकुद भवन र एक व्यापारिक केन्द्र पूर्णरूपमा ध्वस्त बनेको बताए ।

स्थानीय प्रशासनले यस घटनालाई गम्भीर रूपमा लिएको र नागरिकलाई सतर्क रहन आग्रह गरेको उनको भनाइ छ । युक्रेनी राष्ट्रपति भोलोडिमिर जेलेन्स्कीले विश्वका नेताहरूलाई युक्रेनलाई सुरक्षित राख्न आवश्यक सम्पूर्ण सहयोग गर्न आग्रह गरेका छन् ।

रुसी रक्षा मन्त्रालयले रुसका १५ भन्दा बढी क्षेत्रहरूमा युक्रेनले गरेको ड्रोन आक्रमण प्रयासलाई असफल पारेको दाबी गरेको छ । आफूले युक्रेनबाट आएका १५८ ड्रोनलाई नष्ट गरेको र यो आफ्नो पक्षबाट भएको हालसम्मकै सबैभन्दा ठूलो ड्रोन प्रतिरोध रहेको रुसको दाबी छ । 

युद्धका पछिल्ला घटनाले दुवै देशका नागरिकको जनजीवनमा गम्भीर असर पारिरहेको छ । युक्रेनमा हरेक दिनको आक्रमण र प्रतिकारले त्यहाँको जनजीवन अस्थिर बनेको छ भने रुसले आफ्नो सुरक्षालाई थप मजबुत बनाउन प्रयास जारी राखेको छ ।