मदिराले मातेका व्यक्ति जब मिर्गौलाको पैसा माग्दै बरबराए...अनि खुल्यो तस्करीको पोल

एक साताअघि काठमाडौंको गोंगबु क्षेत्रमा ३२ वर्षीय युवा ‘मेरो मिर्गौलाको पैसा खै ?’ भन्दै बरबराउँदै हिँडेको प्रहरीले फेला पार्‍यो । तारकेश्वरमा बस्दै आएका उनलाई प्रहरीले सोधपुछ गर्दा पेट चिरेको घाउ देखाउँदै ‘१० लाख रुपैयाँमा मिर्गौला बेचे पनि चार लाखमात्रै पाएको' सुनाए । 

ती युवाले मानव अंग बेचबिखनको कुरा गरेपछि उनलाई बबरमहलस्थित मानव बेचबिखन ब्यूरोमा ल्याइयो । मदिराको नसा उत्रिएपछि उनले घटनाबारे विस्तृतमा बताए ।

प्रहरीका अनुसार उनले गत माघमै कलकत्तामा पुगेर मिर्गौला बिक्री गरेका रहेछन् । प्रहरीका अनुसार बच्चा बिरामी भएको र आर्थिक अवस्थासमेत कमजोर भएकाउनले बालाजुस्थित एक होटलमा खाना खाइरहेका बेला मकवानपुर भीमफेदीकी शान्तिमाया घलानले मिर्गौला बिक्री गर्न सुझाएकी थिइन् । ‘१०/२० लाखमा मिर्गौला बिक्री हुन्छ, एउटा मिर्गौलाले काम गरिहाल्छ, बेच्ने भए म मान्छे झिकाइदिन्छु’ भन्दै घलानले प्रस्ताव गरिन् । युवाले सहजै स्वीकार गरे । घलानले ललितपुर महालक्ष्मी नगरपालिका–८ बस्ने शंकर खत्री र नारायण परियारलाई होटलमा बोलाइन् । १० लाखमा मिर्गौला बिक्री गर्ने डिल भयो । 

जहाजबाट लैजाँदा प्रहरीले धेरै सोधपुछ गर्ने भएपछि पीडित युवालाई सडक मार्गबाट खत्री र परियारले रक्सौल हुँदै कलकत्ता पुर्‍याए । मिर्गौला आवश्यक पर्ने व्यक्ति र उनका आफन्त भने जहाजमार्फत् पुगे । 

अधिकांश समय मदिरा पिउँदै आएका ती युवालाई तन्दुरुस्त बनाएर मात्रै मिर्गौला झिक्ने योजना कलकत्तामै बन्यो । गत माघमा कलकत्ता पुर्‍याइएका उनलाई चार महिनासम्म फ्लाटमा राखेर खानपिनमा ध्यान दिएर तन्दुरुस्त पारियो । गत जेठमा ती युवाको मिर्गौला कलकत्तास्थित एक अस्पतालमा अप्रेशन गरेर अर्को व्यक्तिमा राखियो । घाउको खाटा नबस्दै ती युवालाई खत्री र परियारलगायतले काँकडभिट्टा नाका हुँदै झापा ल्याएर हातमा एक लाख थमाएपछि उनीहरू फरार भए । 

एक लाख लिएर ती युवा काठमाडौं फर्किंदा उनको छोरासमेत बितिसकेको थियो । पटकपटक ती युवाले मिर्गौला डिल गर्ने व्यक्तिलाई फोन गर्दा जम्मा ४ लाख ७० हजार मात्रै पाए । १० लाखमा मिर्गौला बिक्री गर्ने सर्त भए पनि उनले त्यसमै चित्त बुझाए । मदिरा छाडिसकेका ती युवाले पुनः मदिरा पिउन थालेका थिए । 

ब्यूरोका प्रवक्ता प्रहरी उपरीक्षक (एसपी) गौतम मिश्रका अनुसार यो घटनाले अझै पनि मिर्गौला बिक्री वितरण तथा तस्करीको कामले निरन्तरता पाइरहेको पुष्टि भएको छ । ‘शुरूमा ती युवालाई प्रहरीले सोधपुछ गर्दा विश्वास लागेको थिएन, मदिराले मात्तिएर बरबराएको होला भन्ने लाग्यो,’ एसपी मिश्रले भने, ‘तर, सोधपुछ गर्दै जाँदा धेरै कुरा खुल्यो । मिर्गौला तस्करी गर्ने गिरोहले भारतमै नाता प्रमाणित समेत बनाएर मिर्गौला झिक्ने गरेको देखियो ।’ ती युवा र मिर्गौला पाएकी महिलाको नातामा देवरभाउजूको नाता बनाइएको थियो । 

ब्यूरोका अनुसार पक्राउ परेका परियार आफैंले पनि ११ वर्षअघि मिर्गौला बेचबिखन गरेको अनुसन्धानबाट खुलेको छ । एसपी मिश्रले भने, ‘यो घटनामा मिर्गौला बेचिसकेका समूह नै बढी सक्रिय देखियो । अझै दुई जना पक्राउ गर्न बाँकी छ । हामी अनुसन्धानमै छौं ।’

ब्यूरोका अनुसार पक्राउ परेका खत्री र परियारले मिर्गौला दिलाइदिएबापत पाएको रकम मदिरा पिएरै सक्याउने र पछि फेरि मिर्गौला बेच्ने व्यक्ति र खरिद गर्ने व्यक्ति खोजी गर्दै हिँड्ने गरेको अनुसन्धानले देखाएको छ । ब्यूरोका अनुसार प्रहरीले हालसम्म मिर्गौला तस्करी एवं बेचबिखनमा ७ वटा मुद्दा दर्ता गरेकोमा ब्यूरोले मात्रै चार वटा मुद्दा दर्ता गरेको छ ।

ब्यूरोले पक्राउ परेका व्यक्तिउपर प्रारम्भिक मानव अंग बेचबिखन तथा ओसारपसार मुद्दा अनुसन्धानका लागि जिल्ला अदालतबाट ९ दिनको म्याद पाएको छ । एसपी मिश्रका अनुसार पक्राउ परेकाविरुद्ध संगठित अपराधमा समेत मुद्दा चलाइने छ । उनले भने, ‘मानव अंगको बिक्रीवितरण तथा तस्करी दुई जनाभन्दा बढी व्यक्तिको योजनाबाट भएको देखिँदा उनीहरूविरुद्ध संगठित अपराधमा समेत मुद्दा चलाउँछौं ।’