सरकारले सबै सरकारी कार्यालय तथा सार्वजनिक निकायमा कार्यालय समयमा शेयर कारोबारमा रोक लगाएको छ ।

प्रधानमन्त्री तथा मन्त्रिपरिषद् कार्यालयले आइतबार एक परिपत्र गर्दै सबै सरकारी तथा सार्वजनिक निकायहरूमा कार्यालय समयमा टीएमएस नचलाउने व्यवस्था गर्न निर्देशन दिएको हो ।

सिंहदरबारका कर्मचारीहरू काम छाडेर शेयर बजारमा भुल्नेगरेको स्टोरी लोकान्तरले प्रकाशित गरेको थियो । 

त्यसपछि अख्तियार दुरुपयोग अनुसन्धान आयोगले देशको प्रमुख प्रशासनिक केन्द्र सिंहदरबारमा शेयर कारोबार रोक्न प्रधानमन्त्री तथा मन्त्रिपरिषद् कार्यालयलाई पत्र पठाएको थियो ।

लगतै सरकारले कार्यालय समयमा शेयर कारोबारमा प्रतिबन्ध लगाउन निर्देशन दिएको हो ।

स्रोतका अनुसार शेयर कारोबार हुने सबै टीएमएस सिंहदरबारभित्रको सर्भरमा चलाउन नमिल्नेगरी ब्लक गर्न लागिएको छ ।