०७ साउन २०८३, बिहीबार
स्पेनिस फूटबल क्लब बार्सिलोनाका एट्याकिङ मिडफिल्डर तथा विङ्गर ड्यानी ओल्मो कम्तीमा पनि अबको पाँच साता मैदानबाहिर रहने भएका छन् ।
ओल्मोको मांसपेशीमा चोट लागेको सामाजिक सञ्जालमार्फत जानकारी दिँँदै बार्सिलोनाले उनले पाँच साता खेल्न नसक्ने जनाएको हो ।
ला लिगाअन्तर्गत आइतवार जिरोनाविरुद्धको खेलमा ओल्मो घाइते भएका थिए । उनले खेलको ६१औं मिनेटमा मैदान छाडेका थिए ।
ओल्मोले गत जुलाईको युरोकपमा स्पेनलाई विजेता बनाउन महत्वपूर्ण भूमिका खेलेका थिए । उनी सो प्रतियोगितामा सर्वाधिक गोलकर्ता बनेका थिए ।
त्यसपछि ओल्मोलाई बार्सिलोनाले जर्मन क्लब आरबी लाइपजिगबाट भित्र्याएको हो । उनले बार्सिलोनाका लागि ला लिगाका दुई खेल खेल्दा दुवैमा गोल गरेका छन् ।
