सीके राउतले डर र धम्की देखाएको भन्दै सुरक्षा माग्न प्रहरीमा पुगिन् सोनी [भिडियोसहित]

जनमत पार्टीका अध्यक्ष डा. सीके राउतकी पत्नी सोनी सिन्धु रानीले शान्ति सुरक्षाको माग गर्दै प्रहरीमा निवेदन दिएकी छन् । ललितपुर प्रहरी वृत्त सातदोबाटो पुगेर उनले बिहीबार निवेदन दिएकी हुन् ।

श्रीमानले विगत केही दिनदेखि विभिन्न किसिमका डर/त्रास देखाई सम्बन्धविच्छेद गर्न दबाब दिँदै आएको सोनीको निवेदनमा उल्लेख छ ।

'सम्बन्धविच्छेद नगरेमा म जे पनि गर्न सक्छु । म अहिले निर्वाचित सांसद छु । मेरो पहुँच माथिल्लो निकाय र सरकारसम्म छ । म चाहेको खण्डमा जे पनि गर्न सक्छु । तिमी मसँग नबस । उपत्यका छाडी गाउँघरमा जाऊ भनेर दबाब दिँदै ज्यानसम्बन्धी धाक/धम्की दिएको हुँदा म आफूलाई असुरक्षित ठानी यस वृत्तमा उपस्थित भएकी छु । विपक्षी श्रीमानलाई उपस्थित गराई आवश्यक कारबाही गरी शान्ति सुरक्षाको व्यवस्था समेत गरी पाऊँ,' निवेदनमा उल्लेख छ ।

मुद्दा फाँटका प्रहरी निरीक्षक नरहेकाले भोलि शुक्रबार दर्ता हुने भनी निवेदन प्रहरीमै छाडेर आएको सोनीले लोकान्तरलाई बताइन् । डा. सीके राउतले सम्पत्ति ५ भाग लगाई १ भाग दिएर श्रीमतीसँग सम्बन्धविच्छेद गराई पाऊँ भन्दै ललितपुर जिल्ला अदालतमा मुद्दा दायर गरेका छन् ।

प्रहरी वृत्त सातदोबाटोमै भेटिएकी सोनीले लोकान्तरसँग कुराकानी समेत गरेकी छन् । प्रस्तुत छ, सोनीले लोकान्तरसँग गरेको कुराकानीको सम्पादित अंश :

मेरो श्रीमान मलाई डिभोर्स दिन्छु भनेर 'माइन्ड मेक अप' गरेर बस्नुभएको छ । सहमतिमै डिभोर्स गर्‍यौ भने केटाकेटी र अंश समेत पाउँछौ, नत्र केही पनि पाउँदैनौ भनिरहनुभएको छ । मेरो यति पावर छ कि म एक्लै डिभोर्स दिन्छु, गरेर देखाउँछु भनेर डराउने, धम्क्याउने, थर्काउने काम गर्नुभयो । तर, पनि मैले साइन गरिनँ । हामी अहिले एउटै घरमा बसिरहेका छौं । बच्चाप्रति आमाको जे कर्तव्य छ, त्यो गरिरहेको छु । श्रीमानप्रति पनि जे कर्तव्य छ, त्यो सबै गर्दैछु । मैले नमानेपछि जबरजस्ती उहाँले डिभोर्सको मुद्दा दायर गर्नुभएको छ । मलाई डिभोर्स चाहिएको छैन । मलाई न्यायसंगत अधिकार चाहियो ।

कानूनको दायरामा जे–जे अधिकार हुन्छ, त्यो सबै चाहियो । सँगै बस्न नमानेको हो भने छुट्टै बस्न पनि सकिन्छ । केटाकेटी एडल्ट नहुँदासम्म आमा र बुवा दुवैको सहयोग र माया चाहियो नि ! म केटाकेटीसँगै बस्न चाहन्छु । अहिले एकै घरमा बसे पनि फ्लोर छुट्टाछुट्टै छ ।

जुनबेला डाक्टरसाब जेल बस्नुभयो, त्यो बेला हामीलाई पनि पुलिसबाट टर्चर थियो । घरबाट केही आशा थिएन । माइती पनि टाढा थियो । माइतीबाट आमा र बहिनी आएर मेरो बच्चाको रेखदेख गर्नुभयो । छुटकारा पाउन खोजेको भए त्यो दिन नै छुटकारा लिन्थें होला नि !

उहाँलाई अहिले पनि मैले नै खाना बनाएर दिइरहेको छु । आफ्नो बच्चालाई कति माया गर्छ भन्ने कुरा कुनै आमाले प्रमाणित गर्नुपर्छ र ? उहाँ पनि आमाको कोखबाट जन्मिनुभएको हो । आमाबुबाले नै पालनपोषण गर्नुभएको व्यक्ति हो ।

अहिले उहाँको दाइले उक्साएका कारण डिभोर्स माग्नुभएको हो । जुन दिनदेखि उहाँको दाइ राजनीतिमा लाग्नुभएको छ, त्यो दिनदेखि नै उहाँले उक्साउनुभएको हो । १ भाग सम्पत्ति दिएर छुटकारा पाउन सकियोस् र बाँकी सम्पत्ति आफ्नो होस् भनेर उक्साउनुभएको छ ।

मेरो श्रीमानले अझैसम्म मेरो पहिचान लुकाएर राख्नुभएको छ । मिडियाको अगाडि गयो, पुलिसकोमा गयो भने ज्यानको खतरा हुनसक्छ, किड्न्याप गर्न सक्छन् भनेर बाहिर निस्किन दिनुभएन । मेरो पहिचान लुकाएर राख्नुभयो ।

मेरो बच्चा नभएको भए म पनि इन्डिपेन्डेन्ट भएर काम गर्न सक्थें । बस्न सक्थें । तर, मलाई बच्चाको माया छ । उनीहरूलाई आमा र बुवा दुवैको मायाको खाँचो छ । विगतमा बिरामी हुँदा उपचार नगराउने, मरे मरोस्, मरेदेखि एउटा कामवाली राखिदिन्छु भनेर टर्चर दिने गरेकाले मैले डिभोर्स मागेको थिएँ । त्यतिबेला उहाँले डिभोर्स दिनुभएन । अहिले मलाई डिभोर्स चाहिएकै छैन, उहाँ दाइको उक्साहटमा लाग्नुभएको छ ।

विगतमा डिप्रेसनमा गएको कुरा सत्य हो । ओभरडोज भएपछि मैले औषधि छाडेको हो । औषधि खाँदा धेरै निन्द्रा लाग्ने, थकाइ लाग्ने, टाउको दुख्ने, पेट दुख्ने, भमिट हुने गर्थ्यो । तर, औषधि छाडेपछि अहिले सबै ठीक छ । समयमै सुत्छु, समयमै उठ्छु, सबै काम गर्छु ।

मलाई अंश चाहिएन । मेरा लागि सबैभन्दा ठूला सम्पत्ति नै श्रीमान् र छोराछोरी हुन् । श्रीमान मसँग बस्न नचाहेको हो भने छोराछोरीसँग बस्न सक्छु । उहाँ छुट्टै बस्न सक्नुहुन्छ । तर, मलाई डिभोर्स चाहिएको छैन । १७ वर्ष सँगै बस्दा पनि मैले उहाँलाई विश्वास दिलाउन सकिनँ भने फरक–फरक घरमा रहन सकिन्छ ।

इन्डियाबाट आएपछि डेढ महिनादेखि उहाँसँग बोलचाल छैन । एकै घरमा बस्छु । खाना खान आउँदा खाना पनि दिन्छु । खाना खानुहुन्छ, तर केही बोल्नुहुन्न । कुनै काम परे पनि बोल्नुहुन्न । मलाई धेरै दु:ख लाग्छ । मलाई नराम्रो मान्छेजसरी हेर्नुहुन्छ ।

मैले छोराछोरी हुर्काएँ । अहिले त छोराछोरीले आफ्नो काम आफैं गर्न थालेका छन् । यस्तो अवस्थामा मैले छोराछोरी उहाँलाई दिने कुरै हुन्न । उहाँ राजनीति गर्ने मान्छेले बच्चालाई कतिखेर हेर्नुहुन्छ ? अहिले पनि ४/५ दिनदेखि उहाँ घरमा हुनुहुन्न, मैले नै हेरिरहेको छु ।

अहिले घरमा मलाई धेरै टर्चर छ । डाक्टर'साबले सीसीटीभी क्यामेरा र जासुसी क्यामेराले निगरानी गरिरहनुभएको छ । कसले फोन गर्‍यो, कसले हेल्प गरिरहेको छ, त्यसको समेत निगरानी गरिरहनुभएको छ । मलाई हेल्प गर्न अगाडि आउने मान्छेले नै घर बिगारिदियो भनेर आरोप लगाउनुहुन्छ ।

हेर्नुहोस्, भिडियो :

भिडियो : शिखा श्रेष्ठ–प्रकाश बुढाथोकी/लोकान्तर