२० असार २०८३, शनिबार
लुम्बिनी गुरू योजनाको कामको भुक्तानी नपाएपछि निर्माण व्यवसायीले लुम्बिनी विकास कोषका पदाधिकारीमाथि आक्रमण गरेका छन् ।
कामका भुक्तानी नपाएको भन्दै मंगलबार ठेकेदार व्यवसायीले कोषका कोषाध्यक्ष ढुण्डिराज भट्टराई(सिद्धिचरण) र सदस्य सचिव सानुराजा शाक्यलाई हातपात गरेका हुन् ।
राष्ट्रियसभाको संघीयता सबलीकरण तथा राष्ट्रिय सरोकार समितिको मंगलबार लुम्बिनीस्थित एक होटलमा कार्यक्रम भइरहेको बेला ठेकेदारहरूको समूह होहल्ला गर्दै आक्रमणमा उत्रिएको हो ।
कोषाध्यक्ष भट्टराईलाई एकाएक २० जनाको समूहले लछार्दै आक्रमण गरेका थिए ।
आक्रमणबाट सदस्य सचिव सानुराजा शाक्यको मुखमा चोट लागेको विकास कोषका प्रेस सल्लाहकार विनोद परियारले जानकारी दिए ।
केही दिनदेखि गुरू योजनाको कामको भुक्तानी नपाएको भन्दै आन्दोलनरत निर्माण व्यवसायीहरूको माग सम्बोधन गरी समाधान गर्न लागिरहेको बेला हुल हुज्जतसहित अपमानजनक रूपमा आक्रमण गरिएको कोषाध्यक्ष भट्टराईले बताए ।
उनले आफ्नो ज्यानको खतरा रहेको भन्दै सुरक्षाको माग गरेका छन् ।
बैठक चलिरहेकै बेला समिति सभापति सोनामग्याल्जेन शेर्पाको अगाडि आक्रमण भएको हो ।
कोषको दायित्व ४९ करोडको छ । जसमध्ये संघीय सरकारबाट प्राप्त गर्नुपर्ने ४४ करोड रहेको छ ।
