‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
सहकारी ठगी प्रकरणलाई लिएर राष्ट्रिय स्वतन्त्र पार्टी (रास्वपा)का सभापति रवि लामिछाने नेपाल प्रहरीको अनुसन्धानको दायरामा आउने भएका छन् ।  
सहकारीमा जम्मा भएको बचतकर्ताको रकम अपचलन गरेको आरोपमा पक्राउ परेका गोरखा मिडिया नेटवर्कका तत्कालीन सञ्चालक छविलाल जोशीको बयानका आधारमा लामिछानेलाई अनुसन्धानको दायरामा ल्याउने प्रहरीले तयारी गरेको हो । 

जिल्ला प्रहरी कार्यालय, कास्कीको हिरासतमा रहेका जोशीले सरकारी वकिलको कार्यालयमा बयान दिँदा सूर्यदर्शन सहकारीको रकम गोरखा मिडियामा ल्याउने विषय गीतेन्द्रबाबु (जीबी) राई र लामिछानेलाई नै थाहा भएको उल्लेख गरेका छन् । गोरखा मिडियाका तत्कालीन प्रबन्ध निर्देशक लामिछानेले नै सहकारीको रकम ल्याउन राईलाई सुझाएको बयान जोशीले दिएका छन् । 

पूर्वउपप्रधान एवं गृहमन्त्रीसमेत रहेका लामिछानेले भने सहकारी ठगीमा आफ्नो संलग्नताबारे इन्कार गरिरहेका छन् । तर, उनकै ‘पार्टनर’ जोशीले राई र लामिछानेकै योजनामा गोरखा मिडियामा सहकारीको रकम भित्र्याएर अपचलन भएको बयान दिएका हुन् ।
००००
प्रधानन्यायाधीशमा प्रकाशमानसिंह राउतको नाम अनुमोदन भएको छ । बुधवार बसेको संसदीय सुनुवाइ समितिको बैठकले सर्वोच्च अदालतको प्रधानन्यायाधीशमा राउतको अनुमोदन गरेको हो । यस्तै अस्ट्रेलियाको राजदूतमा चित्रलेखा यादवको नाम अनुमोदन भएको छ ।
००००
उदयपुरमा कोशी प्रदेशकी राज्यमन्त्री सिर्जना राई चढेको गाडीमाथि आक्रमण गर्ने ६ जनाको समूहलाई प्रहरीले नियन्त्रणमा लिएको छ ।
विराटनगरबाट गएको प्रहरीको विशेष टोलीले उनीहरूलाई उदयपुरबाट बुधवार पक्राउ गरेको हो ।  

मंगलवार राति उदयपुरमा राज्यमन्त्री राईसहितको टोलीमाथि आक्रमण भएको थियो । राई उदयपुर र भोजपुरको सीमा क्षेत्रमा बाढीले पुर्याएको क्षतिबारे बुझ्न गएकी थिइन् ।
००००
बागमती प्रदेश प्रमुख दीपकप्रसाद देवकोटाले बागमती प्रदेश मन्त्रिपरिषद्को सिफारिसबमोजिम प्रदेशसभाको चौथो अधिवेशन अन्त्य गरेका छन् । 
प्रदेश प्रमुख देवकोटाले नेपालको संविधानको धारा १८३ को उपधारा २ बमोजिम बागमती प्रदेश मन्त्रिपरिषद्को सिफारिस भई आएअनुसार, संवैधानिक प्रक्रिया पूरागरी प्रदेशसभा बैठकको अन्त्य गरेको प्रदेश प्रमुख सचिवालयका कानुन अधिकृत प्रकाश चापागाईंले जानकारी दिए । यस्तै कर्णालीको अधिवेशन पनि अन्त्य भएको छ । 
००००
नेकपा माओवादी केन्द्रको भ्रातृ संगठन अखिल क्रान्तिकारीको २३ औं राष्ट्रिय सम्मेलन अनिश्चितकालका लागि स्थगित भएको छ । 

सम्मेलनमा उमेरहद, विधान र प्रतिवेदनसहितमा विवाद भएपछि सम्मेलन अनिश्चितकालका लागि स्थगित भएको स्रोतले जनाएको छ । तर अखिल क्रान्तिकारीको अध्यक्षमण्डलले भने छलफल, निर्वाचनको प्रक्रिया, दशैं र बाढीपहिरोका कारण सम्मेलन स्थगित गर्नुपरेको दाबी गरेको छ । 
००००
काठमाडौं जिल्ला अदालतले युवायुवतीलाई यातना दिने ‘सुगर ड्याडी’ नामले परिचित आशिष देउलासहित ४ जनालाई पुर्पक्षका लागि थुनामा पठाउन आदेश दिएको छ । 

जिल्ला अदालतका न्यायाधीश महेन्द्रबहादुर कार्कीको इजलासले बुधवार अपहरण, शरीर बन्धक तथा ज्यान मार्ने मुद्दामा देउलासहितका ४ जनालाई थुनामा पठाउन आदेश दिएको हो ।
००००
नेपाल स्टक एक्सचेन्ज (नेप्से) दोहोरो अङ्कले घटेको छ ।

बुधबार नेप्से परिसूचक २६.०७ अङ्कले घटेर २५९७.४९ को विन्दुमा अडिएको हो ।
००००
हवाई चाप बढेसँगै घटस्थापनादेखि पूर्णिमासम्म रात्रिकालीन उडान हुने भएको छ ।

बाढी पहिरो तथा चाडपर्वका कारण बढ्दो हवाई चापलाई सम्बोधन गर्दै बिहीबार (घटस्थापना)देखि पूर्णिमासम्म रात्रिकालीन उडानको अनुमति दिइएको नेपाल नागरिक उड्डयन प्राधिकरणले जनाएको छ ।
००००
चालु आर्थिक वर्ष २०८१–०८२ का लागि सरकारले ६ प्रतिशत आर्थिक वृद्धि हासिल गर्ने लक्ष्य राखिरहँदा विश्व बैंकले भने पाँच दशमलव एक प्रतिशत रहने अनुमान गरेको छ ।

विश्व बैंकले आज नेपाल ‘डेभलपमेन्ट अपडेट’ प्रतिवेदन सार्वजनिक गर्दै नेपालको कूल गार्हस्थ उत्पादन वृद्धिदर सन् २०२५ मा पाँच दशमलव एक र सन् २०२६ मा पाँच दशमलव पाँच प्रतिशत रहने प्रक्षेपण गरेको हो ।