३० जेठ २०८३, शनिबार
सहकारी प्रकरणमा राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध पक्राउ पुर्जी जारी भएको छ ।
कास्की जिल्ला अदालतले रविलाई पक्राउ गर्न शुक्रबार अनुमति दिएको एक उच्च प्रहरी अधिकृतले लोकान्तरलाई जानकारी दिए ।
गोरखा मिडिया नेटवर्कका तत्कालीन प्रबन्ध निर्देशक लामिछानेमाथि सहकारीको रकम अपचलन गरेको आरोप छ ।
उनीमात्रै होइन, उनका पार्टनर एवं गोरखा मिडियाका अध्यक्ष गितन्द्रबाबु राई (जीबी राई) र सञ्चालक छविलाल जोशी बञ्जाडेमाथि एउटै आरोप छ । छवि अहिले जिल्ला प्रहरी कार्यालय कास्कीकै हिरासतमा छन् ।
उनीविरुद्ध सहकारी ठगी र संगठित अपराध सजायँ ऐनअन्तर्गत अनुसन्धान भइरहेको छ ।
आज कास्की प्रहरीले छविलाई म्याद थप गर्ने बेला रविलाई पक्राउ गर्न अनुमति मागेको थियो ।
'छविले रविका विरुद्ध बयान दिएपछि अनुसन्धानको दायरमा ल्याउनुपर्ने भएकाले पक्राउ पुर्जी मागेका थियौं,' ती प्रहरी अधिकृतले भने ।
कास्कीस्थित पोखराको सूर्यदर्शन, चितवनको सहारा, बुटवलको सुप्रिम र काठमाडौंको स्वर्णलक्ष्मी सहकारीबाट गोरखा मिडियामा मात्र ६५ करोड ५४ लाख रुपैयाँ ल्याइएको थियो ।
