२३ असार २०८३, मंगलबार
नेपाल कम्युनिस्ट पार्टीका महासचिव नेत्रविक्रम चन्द विप्लवले नेपाली राजनीतिलाई अस्थिरतातर्फ धकेल्न अन्तर्राष्ट्रिय हस्तक्षेप बढ्दै गएको आरोप लगाउँदै त्यसको सशक्त प्रतिवाद गर्न जरुरी रहेको बताएका छन् ।
नेकपा दाङले बुधवार देउखुरीमा आयोजना गरेको सर्वपक्षीय अन्तरक्रिया तथा भेटघाट कार्यक्रमलाई सम्बोधन गर्दै उनले यस्तो बताएका हुन् ।
सो अवसरमा महासचिव विप्लवले दलहरूले जनताको भावना समेट्न नसक्दा मुलुक अस्थिरता तर्फ धकेल्ने खतरा बढेको उल्लेख गरे ।
संसदीय दलहरू असफल र बदनाम हुँदै जाँदा जनतामा निराशा बढेको बताउँदै विप्लवले यसको समाधान समाजवादी व्यवस्थाबाट मात्रै सम्भव हुने दाबी गरे ।
विप्लवले राज्य संयन्त्रको नेतृत्व नै भ्रष्टाचारको केन्द्र रहेको आरोप लगाए । राज्य संयन्त्रको भुमिकामा रहेकाहरू दिनप्रतिदिन भ्रष्टाचार र अनियमिततामा संलग्न हुँदै गएकोसमेत उनको भनाइ छ ।
साथै विप्लवले लोकतान्त्रिक गणतन्त्रले केही उपलब्धि दिएपनि त्यसलाई संस्थागत गर्न संसदीय दलहरू असफल भएको बताए । बरु उल्टो प्राप्त उपलब्धि उल्टाउने प्रयास गरिएको उनले दाबी गरे ।
विप्लवले क्रान्तिकारी र समाजवादी आन्दोलनले मात्रै राष्ट्रिय समस्या समाधान गर्ने बताउँदै अस्थिर र अस्थायी रङ्गमञ्चले मुलुकले निकास नपाउनेमा विश्वस्त हुन अपिलसमेत गरे ।
