तिहारको भाइटीकामा बीपी कोइरालाका जेठा छोरा प्रकाशको घरमा कोइराला परिवारबीच जमघट भएको छ । भाइटीकाको दिन कोइराला परिवारका सदस्यबीच प्रकाशको धुम्बाराहीस्थित रहेको घरमा जमघट भएको हो । 

गिरिजाप्रसाद कोइरालाकी पुत्री सुजाताले बीपीपुत्र प्रकाश, श्रीहर्ष, शशांक र केशव–नोनापुत्र डा. शेखर कोइरालालाई भाइटीका लगाइदिएकी हुन् । 

सुजाताले आफ्नै निवासमा कोइराला परिवारका सदस्यलाई निम्त्याएर भाइटीका लगाइदिएकी हुन् । 

भाइटीका र कोइराला परिवारको फोटो शेयर गर्दै सुजाताले सबै दाजुलाई भाइटीकाको शुभकामना व्यक्त गरेकी छिन् । 

यो जमघटमा प्रकाशकी छोरी मनीषा कोइराला पनि सहभागी छिन् । 

पछिल्लो दुई महाधिवेशनमा राजनीतिक रूपमा कोइराला परिवार एउटै कित्तामा उभिएका थिएनन् । तर पारिवारिक जमघट गरेर उनीहरूले पटक-पटक आफूहरू मिल्ने बताउँदै आएका छन् । 

धुम्बाराहीमा भएको भाइटीका कार्यक्रममा कुनै राजनीतिक कुराकानी भने नभएको कोइराला परिवार निकट स्रोतले बतायो । 

‘तिहारको अवसरमा भाइटीकाको दिन भेट्ने टीका लगाउने कार्यक्रम मात्रै भएको हो,’ कोइराला परिवार निकटकै एक स्रोतले भन्यो, ‘सामान्य राजनीतिक कुराकानी त भइहाल्छन् । तर यस अघि जस्तो सन्देश नै दिने गरी राजनीतिक कुराकानी भएन ।’

बीपी कोइरालाका तीन छोरामध्ये जेठा प्रकाश र माइला श्रीहर्ष राजनीतिमा छैनन् ।

बीपीका कान्छा छोरा शशांक, केशव–नोनापुत्र शेखर र गिरिजापुत्री सुजाता मात्रै कांग्रेसको राजनीतिमा छन् । यसमा पनि सुजाता पछिल्लो समय सक्रिय राजनीतिमा छैनन् ।