०६ साउन २०८३, बुधबार
सहकारीको रकम अपचलनको आरोपमा अनुसन्धानका लागि पक्राउ परेका रास्वपा सभापति रवि लामिछानेलाई आज रूपन्देही ल्याउने तयारी छ । जहाजमार्फत् बिहानै रूपन्देही ल्याउने तयारी गरे पनि प्रतिकूल मौसमका कारण केही ढिलाइ भएको हो । बिहान भैरहवामा भिजिबिलिटी नहुँदा जहाज पोखराबाट उड्न सकेको थिएन ।
तर, बाक्लो कुहिरो र हुस्सु कम भएपछि अब १० बजेर २० मिनेटमा रविलाई लिएर जहाज पोखराबाट उड्ने रूपन्देही प्रहरीका प्रवक्ता डीएसपी लक्ष्मी खनालले जानकारी दिइन् ।
उनका अनुसार भैरहवा झारेपछि रविलाई जिल्ला प्रहरी कार्यालय लगेर सिधै सरकारी वकिलको कार्यालयमा बयानका लागि लगिने छ ।
उनलाई ल्याउनुअघि भैरहवामा रास्वपा समर्थकले विरोध प्रदर्शन गर्ने तयारी गरेका छन् । विमानस्थल नजिकै उनीहरू भेला भएका छन् । रास्वपाको प्रदर्शनलाई ध्यानमा राख्दै सुरक्षा व्यवस्था कडा पारिएको डीएसपी खनालले बताइन् ।
पोखराबाट भैरहवा ल्याउन रविलाई बिहान ५ बजे नै पोखरा एयरपोर्ट लगिएको थियो । तर, जहाज उड्न नसकेपछि उनलाई पोखरा विमानस्थलमै राखिएको छ ।
बुटवलमा रहेको सुप्रिम बचत तथा ऋण सहकारी संस्थाको बचतकर्ताको बचत रकम तथा ऋण हिनामिना गरेको आरोपमा किटानी जाहेरी परेपछि प्रहरीले लामिछानेलाई रुपन्देही ल्याउन लागिएको हो ।
कात्तिक ८ गते रुपन्देही जिल्ला अदालतले लामिछानेसहितका आरोपीलाई पक्राउका लागि पुर्जी जारी गरेको थियो ।
कात्तिक २ गते काठमाडौंबाट पक्राउ परेका उनलाई त्यसै राति पोखरा लगिएको थियो ।
