प्रधानमन्त्री एवं नेकपा एमालेका अध्यक्ष केपी शर्मा ओलीले २०८४ को मंसिरसम्म कांग्रेससँगको सत्ता समीकरण कायम रहने बताएका छन् ।

अराजकता र दण्डहीनताविरुद्ध शुक्रबार एमालेले काठमाडौंमा गरेको जागरण सभालाई सम्बोधन गर्दै ओलीले आलोपालोको सहमतिअनुसार यो समीकरण अर्को चुनावसम्म सानदार हिसाबले चल्ने बताएका हुन् ।

‘आज मंसिर ७ गते एमाले सरकारमा पनि छ । एमाले सरकारमा भएरै पनि सभा गरिरहेको छ । के हो ? कसो हो ? भन्ने परिरहेको छ । सरकार बन्दैन भन्थे- बन्यो । विश्वासको मत पाउँदैन भन्थे- पायो । एक महिना, दशैं, तिहार, कात्तिक महिना कट्दैन भन्थे- कट्यो,’ ओलीले भने, ‘अब फरबरी फागुनको कुरा गर्लान् । म भन्न चाहन्छु ०८४ सालको मंसिरको चुनावसम्म अहिलेको समीकरण रहन्छ । सबैले कान खोलेर सुने हुन्छ ।’

ओलीले अब १८/१८ महिना आफू र कांग्रेस सभापति प्रधानमन्त्री बन्ने पनि प्रस्ट्याए । 

‘२०८३ असारसम्म म प्रधानमन्त्री रहन्छु । म प्रधानमन्त्री छोडेर देउवाजीलाई जिम्मा लगाउँछु । मैले अब १८ महिना चलाउँछु । त्यसपछि देउवाले १८ महिना चलाउनुहुन्छ, भ्रममा नपुर्नुस् । कांग्रेस र एमाले प्रतिस्पर्धा पार्टी हुन् । तर, अहिलेको समीकरण हामीबीचको प्रतिस्पर्धाभन्दा हाम्रो एकताको हो ।’