आन्तरिक राजश्व कार्यालय ललितपुरले सीजी मोटर्स प्रालिलाई सबैभन्दा बढी आयकर बुझाउने कम्पनीका रूपमा सम्मान गरेको छ ।

राष्ट्रिय कर दिवसको अवसरमा शुक्रबार राजश्व कार्यालयमा आयोजित एक कार्यक्रमका बीच कम्पनीलाई सम्मान गरिएको हो ।

आन्तरिक राजश्व कार्यालय ललितपुरमा व्यावसायिक स्थायी लेखा नम्बर लिई कारोबार गरेका करदाताहरू मध्ये आर्थिक बर्ष २०७९/०८० को आय विवरणको आधारमा सबैभन्दा बढी आयकर दाखिला गरेकोमा सीजी मोटर्सलाई सम्मान गरिएको कार्यालयले जनाएको छ । 

आन्तरिक राजश्व कार्यालयका प्रमुख कर अधिकृत नवराज पन्थीले चौधरी ग्रुपका प्रबन्ध निर्देशक निर्वाण चौधरीलाई सम्मान-पत्र प्रदान गरेका हुन् ।​

सम्मान पत्र प्रदान गर्दै कर अधिकृत पन्थीले​ सीजी मोटर्सलाई सबैभन्दा बढी आयकर बुझाउने कम्पनीका रूपमा सम्मान गर्न पाउँदा खुसी लागेको  बताए । आगामी वर्षहरूमा कम्पनीले थप व्यावसायिक सफलता हासिल गर्न सकोस् भन्दै उनले शुभकामना दिए ।

चौधरी ग्रुपका प्रबन्ध निर्देशक चौधरीले आफ्नो ग्रुपले देशको कुल सरकारी राजश्वको दुई प्रतिशत कर योगदान गर्न सकेकोमा खुशी व्यक्त गरे ।

राष्ट्रको भौतिक एवं सामाजिक विकासमा यस्तो योगदानलाई बढाउँदै लैजान चौधरी ग्रुप प्रतिवद्ध रहेको उनले बताए ।