सुदूरपश्चिम महोत्सवको १८ औं सँस्करण मङ्सिर २२  देखि धनगढीमा हुने भएको छ । उद्योग वाणिज्य सङ्घ कैलालीले मंगलबार पत्रकार सम्मेलनमार्फत महोत्सवबारे जानकारी दिएको हो ।

महोत्सवको उद्‌घाटनका लागि प्रधानमन्त्री केपी शर्मा ओलीलाई निम्तो दिइएको छ । यद्यपि प्रधानमन्त्रीका तर्फबाट निर्णय आउन बाँकी छ ।

‘हामी महोत्सवको आन्तरिक तयारीमा जुटेका छौं । उद्‌घाटनका लागि प्रधानमन्त्रीलाई निम्तो दिएका छौं । त्यहीँ समयमा उहाँको चीन भ्रमणलगायतका अन्य कार्यक्रम छन् । समय व्यवस्थापन गरेर खबर गर्छौं भन्नु भएको छ,' उद्योग वाणिज्य सङ्घका अध्यक्ष पुष्पराज कुँवरले भने । 

२०६३ सालदेखि धनगढीमा निरन्तर आयोजना हुँदै आएको सुदूरपश्चिम महोत्सव धनगढी उपमहानगरपालिका वडा नम्बर १ पशुपति टोलमा मंसिर २२ देखि पुस २ गतेसम्म सञ्चालन हुनेछ । 

३ करोडको लगानीमा सञ्चालन हुने महोत्सवमा १५ करोडको कारोबार हुने अनुमान गरिएको छ ।

सङ्घका महासचिव ओमबहादुर विष्टका अनुसार कृषि, जडीबुटी, हस्तकला, फर्निचर, अटोमोबाइल्स, गार्मेन्ट, इलेक्ट्रोनिक, होटल र सूचना प्रविधि गरी ५०० स्टलहरू रहनेछन् ।

ती मध्ये हालसम्म करिब ९५ प्रतिशत स्टल बुक भइसकेको छ ।महोत्सवको करिब ७० प्रतिशत काम सम्पन्न भइसकेको आयोजकले जनाएको छ ।