बेलायती सञ्चारमाध्यम बीबीसीले प्रत्येक वर्ष प्रकाशित गर्ने सय महिलाको सूचीमा नेपालकी शिलशिला आचार्य पनि परेकी छिन् । 

सन् २०२४ का लागि विश्वका विभिन्न देशका एक सय जना प्रेरणादायी र प्रभावशाली महिलाको सूचीमा नेपालमा सबैभन्दा ठूलो प्लास्टिक रिसाइक्लिंग नेटवर्क चलाउने आचार्य पनि परेकी हुन् । 

उनको फोहोर व्यवस्थापन व्यवसाय अवनी भेन्चर्सले विपन्न व्यक्तिहरूलाई रोजगारी प्रदान गर्नुका साथै हरित क्षेत्रमा महिला सहभागिता बढाउन केन्द्रित रहेको बीबीसीले जनाएको छ । 

सन् २०१४ मा सञ्चालित ‘धन्यवाद, म मेरो झोला बोक्छु’ अभियानमा शिशिला आचार्यले महत्वपूर्ण भूमिका निर्वाह गरेकी थिइन् । त्यसपछि प्लाष्टिकका झोलामाथि प्रतिबन्ध लगाइएको थियो ।

जलवायु तथा फोहोरमैला व्यवस्थापनसम्बन्धी सचेतना अभियान चलाउने शिशिलाले हिमालमा पर्वतारोहीले छोडेको फोहोर सफा गर्ने वार्षिक अभियानमा पनि योगदान दिएकी छिन् । सन् २०१९ देखि हालसम्म उनले हिमालबाट ११९ टन फोहोर निकालिसकेका छन् ।

आफ्नो कामबाट शिशिलाले जम्मा भएको फोहोरलाई रिसायकल गर्छिन् । हस्तशिल्पमा विज्ञ महिलाहरूले फोहोरबाट टोकरी, चटाई र कृत्रिम गहनाहरू तयार पार्छन्, जसले उनीहरूको जीविकोपार्जनमा पनि मद्दत गर्दछ।

यसअघस गत वर्ष सय महिलाको सूचीमा यौनिक तथा लैंगिक अल्पसंख्यक अभियन्ताका रूपमा कार्यरत नेपालकी रुक्शना कपाली पनि परेकी थिइन् ।