२७ असार २०८३, शनिबार
नेपाल प्रिमियर लिग (एनपीएल)मा लज्जास्पद प्रदर्शनका बीच पोखरा एभेन्जर्स चितवन राइनोजसँग ८७ रनले पराजित भएको छ ।
चितवनको घातक बलिङसामु पोखरा पूर्णरूपमा निरीह बन्यो । पोखराको पहिलो ओभरमै सोहेल तनवीरले तीन र चौथो ओभरमा रिजन ढकालले तीन विकेट लिएर पोखरामाथि हावी बने ।
पोखरा एभेन्जर्सका कप्तान कुशल भुर्तेल पहिलो बलमै डक आउट भए । टिमको ४ रन स्कोर हुँदा दिलिप नाथ, ४ रनमै तेस्रो विकेट बस डी लिडे आउट भएका थिए । उक्त तीन वटै विकेट पाकिस्तानी बलर सोहेल तनवीरले लिएका थिए ।
चौथो ओभरमा आएका रिजन ढकालले पनि पुनः एकै ओभरमा तीन विकेट लिन सफल भए । ६ रनको स्कोरमा दिनेश खरेल चौथो विकेटको रूपमा आउट भए भने किरण ठगुन्ना पनि ७ रनको स्कोरमा पाँचौं विकेटको रूपमा आउट भए । त्यस पछि ७ रनकै स्कोरमा माइकल लिस्क र ७ रनकै स्कोरमा रेयमन रिफर पनि आउट भएका थिए ।
त्यसपछि १०.२ ओभरको खेलमा टिमको स्कोर ४७ रन हुँदा आठौं विकेटको रूपमा मार्क्स क्रिच्ले पनि १७ रन बनाएर पेवेलियन फर्किएका थिए ।
पोखराका लागि विपिन कार्कीले सर्वाधिक ३० रन बनाए । उनले ३ चौका र २ छक्कासहित २४ बलमा ३० रन बनाएर पोखरालाई केही राहत दिन खोजे पनि सफल भएनन् ।
यसअघि पहिले ब्याटिङ गरेको चितवनले ७ विकेटको क्षतिमा १६१ रन बनाएको थियो । चितवनका लागि इंगलिश खेलाडी रवि बोपाराले ३८ बलमा ३ चौका र ३ छक्काको मद्दतले ५१ रन बनाएर आउट भएका थिए ।
बोपराले ३६ बलमा अर्धशतक पूरा गरेका थिए । उनको अर्धशतकीय पालीसँगै कप्तान कुशल मल्लले पनि आक्रामक ब्याटिङ गरेका थिए ।
मल्लले १ चौका र ४ छक्कासहित २३ बलमा ३८ रन बनाएर आउट भएका थिए ।
चितवनले पहिलो पावरप्लेमा तीन विकेट गुमाएर ५० रन बनाएको थियो. त्यस पछि ११.३ ओभरमा १ सय रन पूरा गरेको थियो ।
१९.२ ओभरमा १५० रन पूरा गरेको चितवनले २० ओभरको खले सकिँदा १६१ रन बनाएर सम्मानजनक स्कोर बनाउन सफल भएको थियो । हसन ऐशाखिलले १४ रन, दीपक बोहराले २ रन, लुक बेन्केस्टेनले १६ रन, सन्तोष कार्कीले ११ रन र सोहेल तनवीरले खाता नै नखोली आउट भएका थिए । शरद भेशावकर ११ रन र अमर राउटेला १३ रनमा अविजित रहे ।
पोखराका विपिन कार्की, लीडे र रायफरले समान २/२ विकेट लिए भने सागर ढकालले १ विकेट लिएका थिए ।
