२८ जेठ २०८३, बिहीबार
जिल्ला प्रहरी कार्यालय कास्कीले सहकारी ठगीको आरोपमा पक्राउ परेका राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध फेरि म्याद थपको तयारी गरेको छ । मंसिर ९ गते जिल्ला अदालत कास्कीले दिएको १५ दिनको म्याद आइतबार सकिँदैछ ।
गत कात्तिक २ गते काठमाडौं वनस्थलीबाट पक्राउ परेका रविलाई यो बीचमा बयानका लागि कास्कीपछि रुपन्देही, काठमाडौं र चितवन लगिएको थियो । कास्कीको सूर्यदर्शन सहकारी, काठमाडौंको स्वर्णलक्ष्मी सहकारी, चितवनको सहारा सहकारी, रुपन्देहीको सुप्रिम सहकारी र पर्साको सानोपाइला सहकारीको रकम गैरकानूनी तवरले गोर्खा मिडिया नेटवर्कमा ल्याएर अपचलन गरेको आरोप रविमाथि छ । यी सहकारीबाट गोर्खा मिडियामा ६५ करोड ५४ लाख रूपैयाँ गएको देखिन्छ । गोर्खा मिडियाका तत्कालीन प्रबन्ध निर्देशक रविलाई सहकारीको रकम अपचलनमा मतियार बनाइएको छ ।
रविका साझेदार एवं गोर्खा मिडियाका अध्यक्ष गितेन्द्रबाबु (जीबी) राईलाई प्रहरीले सहकारी ठगीको मुख्य आरोपी बनाएर मुद्दा दर्ता गर्ने तयारी गरेको छ । अर्का आरोपी नेपाल प्रहरीका पूर्व डीआइजी एवं गोर्खा मिडियाका उपाध्यक्ष छविलाल जोशी बञ्जाडेलाई पनि मतियारकै रूपमा मुद्दा लैजाने तयारी रहेको अनुसन्धानमा संलग्न प्रहरी अधिकारीले लोकान्तरलाई बताए ।
ती अधिकारीले भने,‘कास्कीको हकमा सूर्यदर्शन सहकारी ठगीको अनुसन्धान अन्तिम चरणमा पुगेको छ, सम्पत्ति शुद्धीकरण, किर्ते र संगठित अपराधमा म्याद थप भएर अनुसन्धान भएकाले मुद्दा बुझाउन अझै केही दिन लाग्ने देखिन्छ ।’
पूर्वउपप्रधानमन्त्री एवं गृहमन्त्री समेत रहेका रविले चार जिल्लाहरू क्रमशः कास्की, रुपन्देही, चितवन र काठमाडौंमा इन्कारी बयान दिएका छन् । तर, प्रहरीले फेला पारेका प्रमाणलाई उनले चित्तबुझ्दो जवाफ नदिएकै कारण अदालतले म्याद थप गर्दै आएको ती अनुसन्धान अधिकृतले बताए ।
रविले कालिमाटीस्थित स्वर्णलक्ष्मी सहकारीबाट लिएको ऋण आफ्नो नभई संस्थागत भएको बयान दिएका थिए । जबकी उनले स्वर्णलक्ष्मीबाट गोर्खा मिडियामा २ करोड २८ लाख ९८ हजार ४ सय ८० रूपैयाँ पेश्कीबापत लिएको देखिन्छ ।
सरकारी वकिलको प्रश्नमा रविले स्वर्णलक्ष्मीको सञ्चालक समितिको अध्यक्ष जीबी राई आफैं रहेको र उनले नै गोर्खा मिडियामा ऋण दिएको हुनसक्ने जवाफ दिएका थिए । रवि गोर्खा मिडियामा १५ प्रतिशत सेयर प्राप्त गरेकाले सहकारीको रकम ल्याएर अपचलन गर्दाको भागिदार उनीपनि हुने निष्कर्ष अनुसन्धान अधिकृतको छ।
स्वर्णलक्ष्मीबाट गोर्खा मिडिया नेटवर्कका तत्कालीन अध्यक्ष जीबी र प्रबन्ध निर्देशक रविको संयुक्त नाममा दुईपटक ऋण लिएको देखिन्छ । उनीहरूको संयुक्त नाममा २०७८ भदौ ७ गते ‘फर ह्वाट एभर लोन’बापत ४६ लाख ९८ हजार ऋण लिएकोमा अझै १४ लाख ७६ हजार ३ सय ६७ रूपैयाँ चुक्ता गर्न बाँकी छ ।
त्यस्तै, २०७८ पुस १ गते ईको सेभेन सोएट भ्यान खरिदका लागि जीबी र रविकै संयुक्त नाममा ४६ लाख ८८ हजार ऋण लिएको पाइएको छ । त्यसमध्ये पनि २९ लाख ५८ हजार ४३३ रूपैयाँ तिर्न बाँकी रहेको देखिन्छ ।
त्यसो त रुपन्देहीको बुटवलस्थित सुप्रिम बचत तथा ऋण सहकारी संस्थामा रवि आफैंले हस्ताक्षर गरेर बुझाएको ४० लाख ४२ हजारको चेक भेटिएको छ । सुप्रिमबाट गोर्खा मिडियामा साढे ६ करोड रूपैयाँ ऋण प्रवाह भएको थियो ।
रवि आफैंका नाममा समेत दुई करोड ऋण प्रवाह भएको देखिन्छ । सुप्रिमलाई तिरेको रकम रविले आफैंले लिएको ऋण हो वा गोर्खा मिडियाको ऋण हो भन्नेबारे तथ्य बाहिर आएको छैन ।
कास्की प्रहरीले सम्पत्ति शुद्धीकरण मुद्दामा अनुसन्धान गर्दा रविको बैंक खातामा ३५ करोड र उनकी पत्नी निकिताको बैंक खातामा १५ करोड बढी कारोबारको विवरण फेला पारिसकेको छ । रवि र उनको परिवारका सदस्यको सम्पत्ति विवरण अझै केलाउने काम भइरहेको कास्कील प्रहरीले जनाएको छ ।
प्रहरी प्रधान कार्यालयका प्रवक्ता एवं डीआईजी दानबहादुर कार्कीले जिल्ला अदालत पर्साबाट रविविरुद्ध पक्राउ पुर्जी जारी भइसकेकाले उनलाई बयानका लागि पर्सा पनि लैजाने बताए ।
उनले भने,‘कास्की प्रहरीले अनुसन्धान अन्तिम चरणमा पुर्याएको छ । अब रविलाई पर्सास्थित सरकारी वकिल कार्यालयमा बयानका लागि पठाएर पुनः कास्की ल्याएपछि मुद्दा बुझाउने तयारी हुन्छ ।’
