पहिलो पटक भारतबाट पाइप लाइनमार्फत नेपालमा मट्टितेल ल्याइएको  छ । बुधबार मोतिहारी–अमलेखगञ्ज पाइप लाइनमार्फत भारतबाट पहिलोपटक मट्टीतेल नेपाल ल्याइएको हो  ।

बुधबार साँझ साढे ६ बजे नेपालमा पहिलो पटक मट्टितेल ल्याइएको नेपाल आयल निगम मधेश प्रादेशिक कार्यालय अमलेखगञ्जका प्रमुख प्रलन्कर आचार्यले जानकारी दिए । 

परीक्षण ढुवानी अन्तर्गत १ हजार किलोलिटर अर्थात् १० लाख लिटर पाइप लाइनमार्फत ल्याइएको उनको भनाइ छ । 

बरौनी रिफाइनरीबाट मट्टितेल मोतिहारी–अमलेखगञ्ज पाइप लाइनमार्फत ल्याइएको हो  । मोतिहारीबाट बरौनी रिफाइनरीसम्म छुट्टै पाइप लाइन रहेको छ ।

‘परीक्षण ढुवानीअन्तर्गत पहिलो पटक मट्टितेल ल्याएका हौं । मट्टितेल ल्याउँदा कुनै कतै समस्या देखिएन’, उनले भने, ‘हामी मट्टीतेल ल्याउन सफल भएका छौं । अझै केही दिन यस्तो परीक्षण ढुवानी हुनेछ ।’

प्रादेशिक कार्यालय अमलेखगञ्जमा मट्टितेल भण्डारण गर्न १५ हजार किलोलिटर र ७६० किलोलिटरका दुई वटा स्टोरेज ट्यांकी छन् । पाइप लाइनबाट परीक्षण ढुवानी प्रतिघण्टा १५० देखि २५० किलोलिटरको दरले भइरहेको छ । यद्यपि, पाइप लाइनको इन्धन ल्याउन सक्ने क्षमता ३ सय किलोलिटर प्रतिघण्टा रहेको छ । 

इण्डियन आयल कर्पोरेशन (आईओसी) र नेपाल आयल निगमले पेट्रोल र मट्टितेल पाइप लाइनबाट ल्याउन परीक्षण ढुवानी गरिरहेको छ । डिजेल भने यस पाइप लाइनमार्फत नियमित रूपमा ल्याइँदै गरेको छ ।

गत असोज १७ गते आईओसीको प्राविधिक टोलीले पाइप लाइनबाट पेट्रोल ल्याएर टेस्टिङ गर्ने काम सम्पन्न गरेको थियो । भारतीय प्राविधिक टोलीले पाइप लाइनबाट ५ हजार ५ सय किलोलिटर (५५ लाख लिटर) पेट्रोल अमलेखगञ्जको डिपोमा खसालेर सफल परीक्षण गरेको थियो । 

यस पाइप लाइनमार्फत प्रतिदिन ६ हजार किलोलिटर पेट्रोल ल्याउन सकिन्छ । दक्षिण एसियामै पहिलो अन्तरदेशिय पाइप लाइन नेपाल–भारतको सीमामा मोतिहारी–अमलेखगञ्ज पाइप लाइन सञ्चालन छ । सन् २०१९ सेप्टेम्बरदेखि यो पाइप लाइन सञ्चालनमा आएको थियो । यस पाइप लाइनको लम्बाइ करिब ६९ किलोमिटर छ।