२१ असार २०८३, आइतबार
वैदेशिक रोजगारका लागि म्यासेडोनिया पठाउने भन्दै ठगी गरेको आरोपमा एक जना पक्राउ परेकी छन् ।
पक्राउ पर्नेमा खोटाङको केपीलासगढी गाउँपालिका-७ घर भई हाल काठमाडौं महानगरपालिका-४ चण्डोल बस्ने २८ वर्षीय चिना कोयी राई छन् ।
उनले म्यासेडोनिया पठाउने भन्दै २ जना व्यक्तिबाट १२ लाख ९१ हजार रकम ठगी गरेको प्रहरीले जनाएको छ। लामो समयसम्म झुक्यानमा राखेपश्चात विदेश नपठाई सम्पर्कविहीन भएपछि प्रहरीमा उजुरी परेको थियो ।
पीडितको उजुरीपछि खटिएको काठमाडौं उपत्यका अपराध अनुसन्धान कार्यालयको टोलीले राईलाई चण्डोलबाट पक्राउ गरिएको एसपी काजी कुमार आचार्यले जानकारी दिए ।
पक्राउ परेका राईलाई थप अनुसन्धान तथा कारबाहीका लागि वैदेशिक रोजगार विभाग ताहाचल पठाइएको एसपी आचार्यले जानकारी दिए ।
