जिम्बाबे, ३० कात्तिक—जिम्बाबेको सेनाले सैनिक ‘कु’ गर्दै राष्ट्रपति रोबर्ट मुगाबेलाई घरमा नै पक्राउ गरेर राखेको छ । दक्षिण अफ्रिकी राष्ट्रपति ज्याकोब जुमाले मुगाबेले आफूलाई टेलिफोनमार्फत आफू घरमा नै रहेको र सकुशल रहेको जानकारी गराएको पुष्टि गरेका छन् । 
जिम्बाबेमा सत्ता हस्तान्तरणको विषयलाई लिएर उत्पन्न संकटबीच सेनाले बुधबार बिहान सरकारी टेलिभिजन कब्जा गर्दै ‘मुगाबे सुरक्षित रहेको उनका वरिपरिका अपराधी’ विरुद्ध कारबाही गरिएको बताएको थियो । राजधानी हरारेमा सेनाले गस्ती गरिरहेको छ । 

एजेन्सीलाई उदृत गर्दै आजको राजधानी दैनिक लेख्छ—जिम्बाबेमा लामो समयदेखि सत्तामा रहेका ९३ वर्षीय राष्ट्रपति मुगाबेले केही दिनअघि उत्तराधिकारीको विषयलाई लिएर भइरहेको संकटबीच उपराष्ट्रपति इमर्सन मान्नागागावालाई बर्खास्त गरेका थिए । गत साता मान्नागागावालाई बर्खास्त गरेपछि मुगाबेकी श्रीमती ग्रेसीलाई भावी राष्ट्रपति बन्ने बाटो खुला भएको अनुमान गरिएको थियो । 
राष्ट्रपति मुगाबेको निर्णयलाई त्यहाँका सेना प्रमुख कोन्सटंटिनो चिभेन्गाले चुनौती दिएका थिए । सोही अनुसार बुधबार बिहानै राजधानी हरारेमा टेलिभिजन नियन्त्रणमा लिएको थियो भने राजधानीमा केही विस्फोट र गोली चलेका घटनासमेत बाहिर आएका छन् । 
मुगाबेले बेलायतबाट स्वतन्त्र भएपछि सन् १९८० देखि जिम्बाबेलाई नेतृत्व प्रदान गर्दै आएका थिए । बेलायत र अमेरिकाले जिम्बाबेको पछिल्लो अवस्थाबारे चिन्ता व्यक्त गर्दै आफ्ना नागरिकलाई अर्को सूचना प्राप्त नभएसम्मका लागि अन्य स्थानमा नजान आग्रह गरेका छन् ।