नेपाली कांग्रेसका महामन्त्री विश्वप्रकाश शर्माले पूर्वराष्ट्रपति विद्यादेवी भण्डारीलाई सक्रिय राजनीतिमा फर्किने भन्दा पनि सामाजिक परिवर्तनको नायक बन्न सुझाव दिएका छन् ।

शीतल निवासबाट बाहिर निस्केको व्यक्ति कुनै दलको भन्दा पनि साझा बन्नुपर्ने उनको राय थियो । 

शुक्रबार काठमाडौंमा एमाले वरिष्ठ उपाध्यक्ष ईश्वर पोखरेलको पुस्तक विमोचन समारोहमा महामन्त्री शर्माले पूर्वराष्ट्रपति सामाजिक रूपान्तरणको प्रेरक बन्नुपर्ने बताएका हुन् । कार्यक्रममा भण्डारी प्रमुख अतिथिको रूपमा उपस्थित थिइन् ।

‘पूर्वराष्ट्रपतिले के गर्ने भनेर कसैले सोध्यो भने मेरो सुझाव सामाजिक रुपान्तरणको प्रेरकको रूपमा रहनुपर्छ भन्ने छ । तर राजनीतिमै फेरि आउन चाहनु भएको भन्ने चर्चा छ,’ शर्माले भने, ‘शीतल निवासबाट निस्केको पूर्वराष्ट्रपति राजनीतिमा लागेर कसैको मात्र बन्ने भन्दा पनि सामाजिक परिवर्तनको नायक बन्न जरुरी छ ।’ ​

पूर्वराष्ट्रपति रामवरण यादव र भण्डारी मिलेर सामाजिक परिवर्तनको झण्डा उचाल्नु पर्ने शर्माले बताए ।

कार्यक्रममा भण्डारीले लिखित मन्तव्य राखिन् । उनले राजनीतिमा फर्किने चर्चाबारे केही बोलिनन् । 

हिजो (बिहीबार) मात्र एमाले अध्यक्ष एवं प्रधानमन्त्री केपी शर्मा ओलीले विद्या भण्डारीसँग लामो कुराकानी गरेका थिए । भण्डारी सक्रिय राजनीतिमा फर्किने चर्चाले कम्युनिस्ट पार्टीहरू तरंगित बनेका छन् ।